Бір үйдің бес баласы өртеніп кеткен Жітіқарадағы өрттің себебі белгілі болды

Қостанай облысының әкімі Құмар Ақсақалов Жітіқара қаласында бес баланың өмірін қиған қайғылы оқиғаға қатысты пікір білдірді. Әкімнің айтуынша, өрт болған сәтте балалар үйде жалғыз болған.

«Қайғылы оқиға орын алды. Балалар түнде үйде жалғыз қалған. Тірі қалған үлкен бала таңғы төртте оянып, пеш жақпақ болған. Ол отқа отынмен бірге бөтелкені де салғанын айтты. Сол сәтте жарылыс болды. Ол сыртқа жүгіріп шыққан. Құтқарушылар келгенше бәрі болып қойған», – деді Ақсақалов.

Өңір басшысы оқиға орнына барып, балалардың анасы мен әжесімен кездескенін айтты. Трагедиядан бірнеше күн өткен соң екі кәсіпорын отбасыға барлық жиһаз және техникасы бар екі бөлмелі пәтер сатып алып берген.

Әкімнің сөзінше, жылыту маусымы алдында ТЖД қызметкерлері көпбалалы аналар мен әлеуметтік осал топтардың үйлерін тексеріп, мұржалар мен пештердің жағдайын қарайды.

«Улы газды анықтайтын датчиктер орнатылды. Олар көп отбасыға көмектесті. Алайда бұл үйде орнатылған датчик өрт кезінде сөндірулі болған екен. Бұл – тұрғындардың өзіне қатысты мәселе. Батареяны ауыстыру көп шығынды қажет етпейді», – деді Ақсақалов.

Еске салсақ, 11 қазан күні таңертең бір жастан сегіз жасқа дейінгі бес бала өрт салдарынан қаза тапқан болатын. Өрт сөндірушілер оқиға орнына 7 минутта жеткенімен, үйді жалын толық шарпып, шатыры құлап кеткен. Балалардың денелері үйінді астынан табылды. Ал 2011 жылы туған үлкен бала зардап шекпеді. Өрттің алдын ала себебі ретінде пешті қараусыз қалдыру айтылған. Еңбек және халықты әлеуметтік қорғау министрі пешті сағат 21.00 шамасында балалардың анасының өтінішімен танысы тұтатқаны туралы мәлімдеген.