Бір палаталы Парламент: Тоқаев жұмыс тобын құрды

Мемлекет басшысы Қасым-Жомарт Тоқаев «Парламенттік реформа жөніндегі жұмыс тобы туралы» өкімге қол қойды. Бұл бастама Президенттің 2025 жылғы 8 қыркүйектегі Жолдауында жарияланған тапсырмаларды орындауға бағытталған.

Жұмыс тобының мақсаты – Парламенттік реформаға қатысты ұсыныстарды тұжырымдау, оның ішінде жаңа саяси реформаның құқықтық және институционалдық негізін әзірлеу.

Құрамына Парламент Мәжілісі мен Сенатының депутаттары, Қазақстан халқы Ассамблеясының өкілдері, саяси партиялар фракцияларының жетекшілері, сондай-ақ заң ғылымының белгілі мамандары, ғылыми институттардың басшылары, Ұлттық құрылтай мүшелері мен сарапшылар енді.

Президент бұған дейін Қазақстан халқына Жолдауында бір палаталы Парламент құру бастамасын ұсынған болатын. Мемлекет басшысы бұл қадамның елдің саяси жүйесін жаңғыртудағы маңызды кезең екенін атап өткен еді.

«Бұл – асығыс шешілетін мәселе емес. Ол азаматтық қоғамда, сарапшылар ортасында және қазіргі Парламентте кеңінен талқылануы қажет. Реформаның маңызы ерекше болғандықтан, оны талқылауға бір жыл уақыт қажет деп есептеймін. 2027 жылы жалпыұлттық референдум өткізуге болады. Содан кейін Конституцияға тиісті өзгерістер енгіземіз», – деген болатын Президент.

Тоқаевтың айтуынша, жаңа жүйе енгізілген жағдайда бір палаталы Парламент тек партиялық тізім бойынша сайлануы тиіс. Әлемдік тәжірибеде кең тараған үлгі осы деп санайды ол.

Жаңа реформа толық іске асқанға дейін Мәжіліс пен Сенат өз қызметін жалғастырады, ал саяси партиялар бәсекелі сайлауға дайындалуға мүмкіндік алады.