Бір палаталы Парламент құруды ұсынамын – Тоқаев

Президент Қасым-Жомарт Тоқаев Қазақстан халқына Жолдауында жаңа саяси реформа – бір палаталы Парламент құру бастамасын ұсынды.

Мемлекет басшысы бұл идея еліміздің саяси дамуының заңды жалғасы екенін атап өтті. 

«Мен Сенатқа он жыл басшылық еттім. Бұл жұмысты қашанда зор мәртебе әрі үлкен жауапкершілік деп санадым. Сондықтан парламенттік реформа туралы айту маған оңай емес. Соған қарамастан мен дәл бүгін елімізде көп ұзамай бір палаталы Парламент құру туралы бастама көтергім келеді», – деді Президент.

Тоқаевтың айтуынша, бұл – асығыс шешілетін мәселе емес. Ол азаматтық секторда, сарапшылар ортасында және қазіргі Парламентте кеңінен талқылануы қажет.

«Реформаның мән-маңызы айрықша екенін ескерсек, оны талқылауға бір жыл уақыт керек деп ойлаймын. Содан кейін, яғни 2027 жылы жалпыұлттық референдум өткізуге болар еді. Содан соң Конституцияға тиісті өзгеріс енгізе аламыз», – деді Мемлекет басшысы.

Президент бір палаталы Парламентті тек партиялық тізім бойынша сайлау орынды болатынын айтты. Оның пікірінше, бұл әлемде кең тараған тәжірибе.

Жаңа реформа жүзеге асқанға дейін Мәжіліс пен Сенат өз қызметін жалғастыра береді. Ал саяси партиялар бәсекелі сайлауға дайындалуға уақыт алады.

«Мен еліміздің және халқымыздың тағдырына қатысты қандай да бір мәселеге келгенде тек қана ашық саясат жүргізу керек деп санаймын, мұндай ауқымды реформаны қоғамнан құпия ұстауға болмайды деп есептеймін», – деді Қасым-Жомарт Тоқаев.