Бір айда екінші өлім: ШҚО-дағы KAZ Minerals шахтасында тағы бір жұмысшы қаза тапты

Шығыс Қазақстан облысында орналасқан KAZ Minerals тобына қарасты кәсіпорында тағы бір кенші қаза тапты. Компанияның ресми мәлімдемесіне сәйкес, қайғылы оқиға 30 мамыр күні сағат 20:30 шамасында «Востокцветмет» ЖШС-не тиесілі Артемьев шахтасында болған. Тау жынысының құлауы салдарынан жұмысшы үйінді астында қалып қойған.

«30 мамырда Артемьев шахтасында тау жынысының құлауы салдарынан кәсіпорын жұмысшысы қаза тапқанын терең қайғырып хабарлаймыз. Бұл бүкіл ұжым үшін ауыр қаза. Әріптесіміздің отбасына, туған-туыстарына қайғырып көңіл айтамыз. Компания марқұмның отбасына барлық қажетті көмек пен қолдауды көрсетеді», – делінген кәсіпорын таратқан ресми хабарламада.

Төтенше жағдайдан кейін аталған учаскедегі барлық өндірістік жұмыстар уақытша тоқтатылды. Қазіргі уақытта құзырлы мемлекеттік органдардың қатысуымен арнайы тергеу амалдары жүріп жатыр. Кәсіпорын басшылығы болашақта мұндай трагедияларды болдырмау үшін оқиғаның толық мән-жайын анықтау маңызды екенін жеткізді.

Айта кетейік, бұл – соңғы бір ай ішінде аталған шахтада тіркеліп отырған екінші өлім дерегі. Осыған дейін, 9 мамырда Артемьев шахтасында жөндеу жұмыстарын жүргізу кезінде шаң-желдеткіш қызметінің механигі шамамен 9 метр биіктіктен құлап, алған жарақаттарынан көз жұмған еді. Сондай-ақ 27 сәуірде Абай облысындағы Орловская шахтасында тау жынысы құлап, бір жұмысшы мертігіп, екіншісі қаза тапты. Наурыз айында кәсіпорын нысандарының бірінде екі қызметкер улы газбен уланып, оның біреуі қайтыс болған болатын. Ал 2024 жылдың күзінде «Ертіс» және «Артемьев» шахталарында бес адам ажал құшқан еді.

Өндіріс орындарында жұмысшылардың қаза табуы елімізде жиілеп кетті. Мысалы, 5 мамыр күні таңертең Өскемендегі «Қазцинк» зауытында болған жарылыс салдарынан екі адам оқиға орнында мерт болып, тағы бес қызметкер жарақат алған, кейінірек зардап шеккендердің бірі ауруханада көз жұмды. ТЖМ алдын ала болжамы бойынша, жарылысқа түтін сорғышты тазалау кезіндегі газ-ауа қоспасының тұтануы мен конструкциялардың ішінара құлауы себеп болған.