Бір апта жуылмаған жастыққап дәретхана отырғышынан 17 000 есе лас

Төсек жабдықтарын шығаратын Amerisleep компаниясының зерттеуі бойынша, жастыққаптар небәрі бір аптаның ішінде қатты ластанып кетеді. Мысалы, бір апта қолданылған жастық тысының әр шаршы дюймінде 3–5 миллионға дейін бактерия болуы мүмкін. Бұл дәретхана отырғышымен салыстырғанда шамамен 17 000 есе көп.

Зерттеушілер төсек жабындыларында түрлі бактериялардың колонияларын тапқан. Олардың арасында өкпе қабынуын (пневмония) немесе тамақтан улануды қоздыруы мүмкін бактериялар да кездеседі. Кейбірі зиянсыз болғанымен, енді біреулері тері инфекцияларын немесе басқа ауруларды тудыруы ықтимал.

Неліктен жастыққап тез ластанады?

• Өлі тері жасушалары. Адам күн сайын шамамен 50 миллион өлі тері жасушасын түсіреді. Олардың көбі жастыққа сіңіп, бактерияларға қорек болады

• Күндізгі шаң мен кір. Терімізге шаң, бактерия, кір, үй жануарының жүндері жабысады. Түнде төсекке жатқанда, микробтар жастыққа жұғады

• Тер мен май. Ұйықтағанда бөлінетін тер, май және сілекей жастықты ылғалды етіп, микробтардың өсіп-өнуін жылдамдатады

• Ыстық ауа райы. Жазда жылы, ылғалды ауа микробтардың одан сайын көбеюіне жағдай жасайды

Дерматологтар мен гигиена мамандары жастық қаптарын аптасына кемінде бір рет жууға кеңес береді. Бұл:

– тері ауруларының алдын алады
– ұйқы сапасын жақсартады
– аллергия мен микробтық инфекциялардан қорғайды.