Бір адамның атында 1015 пәтер бар: Қазақстанда ең ірі меншік иелері белгілі болды

Қазақстанда кейбір азаматтың иелігінде ондаған, тіпті жүздеген пәтер бар. «Азаматтарға арналған үкімет» мемлекеттік корпорациясының TengriHOME-ға берген жауабына сәйкес, елде 10-нан астам пәтері бар 1 267 адам тіркелген.

2026 жылғы 27 ақпандағы дерек бойынша:

• екіден көп пәтері бар азаматтар саны – 172 236
• бес пәтерден көп жылжымайтын мүлкі барлар – 11 072
• 20-дан көп пәтері бар 281 адам
• 50-ден астам пәтерге ие 74 адам бар.

Сонымен қатар бір жеке тұлғаның атына тіркелген пәтерлердің ең көп саны 1 015-ке жеткен.

Жалпы Қазақстан бойынша 3 470 289 пәтер тіркелген.

Бұл мәліметтер тұрғын үй нарығында пәтерлерді жаппай сатып алатын инвесторлар үлесіне қатысты сарапшылар пікірінен кейін белгілі болды. Мамандардың айтуынша, көптеген мәмілелерді қарапайым сатып алушылар емес, тұтас подъездерді сатып алатын ірі инвесторлар жасайды.

Ұлттық статистика бюросының дерегінше, 2025 жылы Қазақстандағы тұрғын үй қорының жалпы ауданы 447,3 млн шаршы метр болған. Бір тұрғынға шаққанда тұрғын үймен қамтамасыз ету көрсеткіші 25,1 шаршы метрді құрайды. Қалаларда бұл көрсеткіш 27,4 шаршы метр болса, ауылдық жерлерде 21,3 шаршы метр деңгейінде.