Сыртқы істер министрінің ұсталғаны рас па?

Мәдениет және ақпарат министрі Аида Балаева Сыртқы істер министрі Мұрат Нұртілеудің ұсталғаны жайлы әлеуметтік желілерде тараған ақпаратты жоққа шығарды.

Бұған дейін Orda порталы құқық қорғау органдарындағы дереккөздеріне сүйеніп, Нұртілеу, кәсіпкер Хаджи Хаджиев және ҰҚК-ның бірқатар жоғары лауазымды қызметкерлері ұсталды деп хабарлаған еді.

Facebook-тегі жазбасында Балаева жалған мәлімет тарату әкімшілік әрі қылмыстық жауапкершілікке әкелетінін ескертіп, журналистерді расталмаған ақпаратқа ерудің салдарына назар аударуға шақырды.

«Хайп қуған жалған деректер азаматтардың ар-намысы мен қадір-қасиетіне нұқсан келтіріп, жақындарына зиян тигізуі мүмкін», – деді министр.

Orda болса, «билік жоққа шығарады, бірақ біздің дереккөздеріміз басқаша айтады» деген ұстанымда қалды. Ал Сыртқы істер министрлігі әзірге ресми түсініктеме берген жоқ.