Бидай алқаптары қысқарады: 2026 жылы қандай дақылдарға басымдық беріледі?

Қазақстанда 2026 жылға арналған егіс алқаптарының болжамды құрылымы бекітілді. Жалпы егіс көлемі 23,8 млн гектарды құрайды, бұл өткен жылмен салыстырғанда 180 мың гектарға артық. Құрылым бидай алқаптарын қысқартып, жоғары рентабельді дақылдардың үлесін арттыруға бағытталған.

Үкімет отырысында Ауыл шаруашылығы министрі Айдарбек Сапаров көктемгі егіс жұмыстарына дайындық барысын баяндады. Оның айтуынша, 2026 жылы азықтық дақылдар 242 мың гектарға, арпа 94 мың гектарға, жүгері 90 мың гектарға ұлғаяды. Майлы дақылдар 55 мың гектарға, картоп 10,3 мың гектарға көбейеді. Ал бидай алқабы 125 мың гектарға қысқарып, 12,1 млн гектарды құрайды.

– Биыл көктемгі дала және егін жинау жұмыстарына жеңілдетілген кредит беруге 700 млрд теңге бағыттау жоспарлануда. Қазіргі уақытта шамамен 1 900 ауыл шаруашылығы тауарын өндіруші 200 млрд теңге көлемінде қаржыландырылды, бұл өткен жылдың осы кезеңімен салыстырғанда 6%-ға артық, – деді министр.

Сонымен қатар отандық ауыл шаруашылығы техникасын жеңілдетілген лизингке беру кемінде 300 млрд теңге көлемінде жалғасады. Егіс науқанын уақтылы өткізу үшін 402 мың тонна жеңілдетілген дизель отыны бөлінген. Техника паркін жаңарту деңгейін 8%-ға жеткізу жоспарланып отыр.