Бибісара Асаубаеваның мәлімдемесіне қатысты министрлік пен федерация түсініктеме берді

Қазақстандық шахматшы, халықаралық гроссмейстер Бибісара Асаубаева әлеуметтік желіде жариялаған үндеуінен кейін Туризм және спорт министрлігі мен Қазақстан шахмат федерациясы ресми түсініктеме берді. Спортшы өз жазбасында жалақысының қысқаруы, халықаралық жарыстарға дайындықты қаржыландыру және мемлекеттік қолдау мәселелерін көтерген еді.

Бұл мәселеге қатысты Туризм және спорт министрінің орынбасары Серік Жарасбаев пікір білдірді.

Оның айтуынша, Бибісара Асаубаева 2023–2024 жылдары Спортты дамыту дирекциясынан ай сайын 1 миллион теңге көлемінде жалақы алып келген. Алайда 2025 жылдан бастап басым спорт түрлерінің жаңа тізімі бекітіліп, шахмат оған енбегендіктен келісімшарт көлемі қайта қаралған.

Министр орынбасарының мәліметінше, Спорт пен туризмді қолдау қоры спортшының дайындық жұмыстарына биыл 100 миллион теңге бөлген. Сондай-ақ Бибісараның командасымен тұрақты байланыс орнатылып, барлық ресми өтініштерге жауап берілген.

Серік Жарасбаев II дәрежелі «Барыс» орденінің тапсырылмауына қатысты да түсініктеме берді. Оның сөзінше, спортшының жарыстар мен оқу-жаттығу жиындарына байланысты тығыз кестесі марапатты уақытылы табыстауға мүмкіндік бермеген. Министрлік өкілі бұл мәселе бақылауда екенін атап өтті.

Сонымен қатар ол спорттағы қаржыландыру мәселесіне тоқталып, соңғы уақытта қоғамдық талқылауларда материалдық қолдау тақырыбы жиі көтерілетінін айтты. Оның пікірінше, спортшылардың басты міндеті халықаралық ареналарда ел намысын қорғап, Қазақстанның абыройын арттыру болуы тиіс.

«Мемлекет барлық федерацияларға жүйелі түрде қолдау көрсетіп келеді. Сондықтан туындаған мәселелерді әлеуметтік желілер арқылы емес, ашық диалог арқылы шешкен жөн. Спорттағы негізгі басымдық нәтиже мен ел имиджі болуы керек», – деді Серік Жарасбаев.

Өз кезегінде Қазақстан шахмат федерациясының өкілі Гүлмира Даулетова федерация спортшыларға жалақы төлемейтінін, тек шәкіртақы мен гранттар бөлетінін мәлімдеді.

Оның айтуынша, федерация президенті Тимур Турлов келгенге дейін шахматшылардың шәкіртақысы 50–100 мың теңге көлемінде болса, гранттар 10–20 миллион теңге аралығында болған. Кейін бұл қолдау көлемі бірнеше есеге артқан.

Гүлмира Даулетованың мәліметінше, биыл Бибісара Асаубаеваға федерация тарапынан жалпы 80 миллион теңге көлемінде грант бөлінген. Оның 40 миллионы – «Алтын грант», ал қалған 40 миллионы – Тимур Турлов атынан берілген президенттік грант. Бұдан бөлек, шахматшы блиц шахматтан әлем чемпионы атанғаннан кейін 25 миллион теңге көлемінде сыйақы алған.

Федерация өкілінің айтуынша, 2024 жылғы Дүниежүзілік шахмат олимпиадасының күміс жүлдесі үшін ұлттық құрамадағы әрбір спортшыға 20 миллион теңгеден төленген. Бұл төлемдер гранттардан бөлек жүзеге асырылған.

Осылайша, Бибісара Асаубаева көтерген мәселелерге қатысты министрлік пен федерация өз ұстанымдарын білдірді. Тараптар спортшыға көрсетілген қолдау көлемін жариялап, қаржыландыру мен мемлекеттік қолдау төңірегінде түсініктеме берді. Ал шахматшының мәлімдемесі қоғамда жоғары жетістіктер спортын қаржыландыру және спортшыларды қолдау жүйесіне қатысты талқылауды қайта жандандырды.

Нуризат Муратбекқызы