Бибісара Асаубаева блицтен үш дүркін әлем чемпионы атанды

Қазақстандық шахматшы Бибісара Асаубаева блиц бойынша әлем чемпионы атағын үшінші мәрте иеленді. Дохада өткен финалда ол украиналық Анна Музычукты 2,5:1,5 есебімен жеңді. Шешуші партияда жеңіс 47-ші жүрісте анықталды.

21 жастағы тараздық спортшы бұған дейін 2021 және 2022 жылдары да блицтен әлем чемпионы атанған. Биыл рапид турнирінде жолы болмағанымен, блицте Асаубаева қарсыластарына басымдық танытып, тағы бір алтын жүлдені қоржынына салды.

Жеңісімен шахматшыны Мемлекет басшысы Қасым-Жомарт Тоқаев құттықтады. Президент өз құттықтауында Қазақстан шахмат қауымдастығының отандасымызды зор мақтанышпен қабылдайтынын атап өтіп, халықаралық аренадағы айтулы жетістіктері мен елімізде шахматты дамытуға қосқан үлесін жоғары бағалады. Осыған орай Бибісара Асаубаеваны II дәрежелі «Барыс» орденімен марапаттау туралы шешім қабылданғаны айтылды.