Бибігүл Жексенбай аудандық және облыстық баспасөз мұрағатын сақтаудағы проблемаларды көтерді

Сенатор Бибігүл Жексенбай депутаттық сауалында аудандық және облыстық баспасөз мұрағаттарын сақтау ісінде қордаланған өзекті мәселелерге назар аударды.

Сенатордың айтуынша, Қазақстанда 200-ден астам аудандық және қалалық газет бар, олардың көпшілігі жүз жылға жуық уақыттан бері жарық көріп келеді. Бұл басылымдар өңірлердің әлеуметтік-экономикалық дамуын, жергілікті билік органдарының ресми шешімдерін және елді мекендердің күнделікті өмірін жүйелі түрде жариялап отырған.

Алайда соңғы жылдары аудандық баспасөз архивтері күрделі қиындықтарға тап болып отыр. Редакциялар жабылған немесе қайта ұйымдастырылған жағдайда архив материалдары жоғалып немесе мүлдем жойылып кетуде. Сонымен қатар 1930–2000 жылдар аралығында шыққан аудандық газеттердің бірыңғай цифрлық тізілімі мен толық электрондық қоры әлі қалыптаспаған.

Бибигүл Жексенбай құқықтық тәуекелдерге ерекше тоқталды. Оның сөзінше, 1990–2000 жылдары көптеген ресми шешімдер тек аудандық газеттерде жарияланған. Сондықтан архивтердің жойылуы азаматтардың құқықтарын қорғауға және сот тәжірибесіне кері әсер етуі мүмкін.

Сенатор аудандық газеттердің архивтері ғылыми зерттеулер, әлеуметтік және демографиялық талдау, мемлекеттік саясаттың тиімділігін бағалау үшін аса құнды дереккөз екенін атап өтті. Бұл бағыт «Ұлттық мұра» және «Цифрлық Қазақстан» бастамаларымен толық үндеседі.

Осыған байланысты Бибигүл Жексенбай аудандық баспасөз архивтеріне толық инвентаризация жүргізуді, оларды сақтау мен цифрландырудың бірыңғай ұлттық стандартын әзірлеуді, сондай-ақ жабылған редакциялардың барлық архив материалдарын міндетті түрде мемлекеттік архивтерге тапсыру тетігін енгізуді ұсынды.