"Бес минут жеткілікті". Экология министрі көлік жылытуға қатысты пікір білдірді

Экология және табиғи ресурстар министрі Ерлан Нысанбаев көлікті бес минуттан артық жылытуға салынатын айыппұлға қатысты пікір білдірді. Министр бұл талаптың экологияны жақсарту үшін маңызды екенін атап өтті.

«Экология тұрғысынан біз жол қозғалысы ережелерін сақтау өте маңызды деп санаймыз, оның ішінде көлікті бес минуттан артық жылытуға тыйым салынған талап бар. Солтүстік өңірлерге келетін болсақ, көлікті бес минут жылыту жеткілікті, бұл кез келген аймақта қозғалысты бастауға мүмкіндік береді», – деді Нысанбаев.

Министр сондай-ақ бұл талапты өз көлігіне сынап көруді жоспарлап отырғанын және нәтижесін кейінірек жариялайтынын айтты.

Көлікті жылыту уақытын шектеу мәселесі, әсіресе, қысы қатаң солтүстік өңірлерде қызу талқыланып жатыр.