Берік Уәли «Елімай» футбол командасы төңірегіндегі жағдайға қатысты түсініктеме берді

Семейлік «Елімай» футбол клубының жанкүйерлері тарапынан түскен көптеген шағымға байланысты аймақ басшысы Берік Уәли Қазақстан Футбол федерациясының президенті Марат Омаровпен арнайы келіссөз жүргізді.

Қазақстан Премьер-лигасының 2026 жылғы маусымы аясында өткен «Ордабасы» мен «Елімай» кездесуінен кейін клубтың бапкерлік құрамы мен жанкүйерлері бас төреші Арман Исмуратовтың шешімдеріне қатысты наразылық білдірді. Атап айтқанда, команда бапкері Андрей Карпович төреші тарапынан бейәдеп сөздер айтылғанын хабарлады.

Аймақ басшысы Берік Уәли жанкүйерлердің өтініштері назардан тыс қалмайтынын және мәселенің әділ шешілуі қажеттігін атап өтті.

«Соңғы уақытта «Елімай» футбол клубының жанкүйерлерінен көптеген өтініш келіп түсуде. Біз көтерілген мәселелердің мән-жайын жан-жақты зерттеп, әділдік пен ашықтық қағидаттарының сақталуы үшін тиісті жұмыстар жүргіземіз. Осыған байланысты Қазақстан футбол федерациясының басшысы Марат Омаровпен келіссөз жүргіздім. Ол барлық жағдай мұқият қаралатынын, арнайы комиссия құрылып, істің соңына дейін тергелетінін мәлімдеді. Әділдікке қатысты біздің ұстанымымыз өзгеріссіз қалады. Бұл мәселе менің жеке бақылауымда», - деді Берік Уәли.

Қазіргі таңда аталған жайт бойынша Қазақстан футбол федерациясы арнайы комиссия құрып, тергеу амалдарын бастады.