Белсенділер Розыбакиев көшесінің атын Мұхтар Шахановтың есімімен өзгертуді ұсынды

Алматы қаласының белсенділері мегаполистің ірі магистральдардың бірі – Розыбакиев көшесінің атауын өзгертіп, оған көрнекті ақын, қоғам қайраткері Мұхтар Шахановтың есімін беруді ұсынды. Тиісті бастама Gosrating ашық петициялар порталында жарияланды.

Петиция авторларының айтуынша, Мұхтар Шахановтың есімін Алматы картасында мәңгілікке қалдыру – тарихи әділдік орнатудың нышаны. Мәтінде ақынның саналы ғұмырының басым бөлігі Алматы қаласында өткені, оның ұлттық мүдде мен мемлекеттік тілді қорғаудағы ерен еңбегі ерекше атап өтілген.

«Тарихтың шешуші кезеңдерінде халқының абыройын, қазақ тілін және егемендігімізді қорғаған тұлғаның рухына тағзым ету – біздің парызымыз», – делінген ресми үндеуде.

Ұсыныс жасаушылар көше таңдау себебін Мұхтар Шаханов тұлғасының қоғамдық маңызымен байланыстырады. Көше Алматының ең ұзын көлік артерияларының бірі саналады (шамамен 7 шақырым). Ол Бостандық және Алмалы аудандарын қиып өтіп, ірі білім беру мекемелері (AlmaU) мен қоғамдық нысандардың (Тұңғыш Президент Қорының спорт кешені, MEGA Alma-Ata) жанынан өтеді.

Сонымен қатар белсенділер Абдолла Розыбакиевтің есімін ұлықтауды өзге форматта жалғастыруды ұсынады. Атап айтқанда, оның есімін қайраткердің өмірбаянымен тікелей байланысты нысандарға беру немесе Көрнекті тұлғалар аллеясында бюстін орнату мәселесін қарастыру сұралған.

Қазіргі уақытта петиция бойынша дауыс беру процесі жалғасуда. Соңғы мәліметтерге сәйкес, бастаманы 260-тан астам азамат қолдаса, 70-ке жуық адам қарсылық білдірген.

Естеріңізге сала кетейік, ақын Мұхтар Шаханов 2026 жылдың 19 сәуірінде өмірден өтіп, Түркістан облысындағы Қоғам ауылында жерленген болатын.