Белсенділер Астанадағы бірыңғай коммуналдық оператордың 50 пайыздық үлесін мемлекетке қайтаруды талап етті

Астанадағы Тұтынушылар құқығын қорғау қоғамының сарапшысы Марат Бөлекбаев қала әкімі Жеңіс Қасымбекпен кездесуде «Астана ЕРЦ» ЖШС-нің 50%-дық мемлекеттік үлесін жекешелендіру заңсыз жүргізілгенін мәлімдеді. Ол прокуратурадан сатып алу-сату келісімдерін заңсыз деп тану үшін сотқа талап-арыз беруді талап етті.

«Мен “Астана ЕРЦ” компаниясының 50%-дық мемлекеттік үлесін жекешелендіру мәселесін көтергім келеді. Бұл процесс акционерлік қоғамдар және табиғи монополиялар туралы заңдарды бұза отырып жүргізілген. Жылдық айналымы 11 млрд теңге болатын компания 85 млн теңгеге Клебанов мырзаға (Александр Клебанов, “ЦАТЭК” АҚ-ның ірі акционері – ред.) сатылды», – деді қоғам белсендісі.

Оның айтуынша, қоғам белсенділері Астана қаласының активтер және мемлекеттік сатып алу басқармасының тапсырмасымен «Астана ЕРЦ»-нің 50%-дық үлесін сату бойынша «СПК Астана» АҚ-ның әрекетін заңсыз деп тануды талап етеді.

Сонымен қатар 2020 жылы «СПК Астана» АҚ мен «ЦАТЭК» АҚ арасында жасалған, кейін 2021 жылы «ЦАТЭК» АҚ мен «Caspian Five Group» ЖШС арасындағы келісімшарттарды жарамсыз деп тану қажет деп санайды.

Өз кезегінде әкім Жеңіс Қасымбек бұл мәселе бойынша жазбаша өтініш беруді сұрап, жауап беруге уәде етті.