Бектенов барлық автожол жобасын 1 қазанға дейін тексеруді тапсырды

Қазақстан Премьер-министрі Олжас Бектенов Көлік министрлігі мен Ұлттық сапа орталығына (ҰСО) барлық автожол жобаларының жүзеге асырылуын 1 қазанға дейін толық тексеруді тапсырды, деп хабарлады Үкіметтің баспасөз қызметі.

«Тексеріс қорытындысы бойынша есеп беріп, кінәлілерді жауапқа тарту жөнінде ұсыныстар енгізу қажет. Сондай-ақ Көлік және Қаржы министрліктеріне ҰСО жұмысын күшейтуге қатысты шешімдер дайындауды тапсырамын», – деді Үкімет басшысы.

Жол желілерін дамытуға арналған жиында бірнеше өңірде, оның ішінде Жетісу және Алматы облыстарында, ҰСО ескертулеріне қарамастан, жолдардың пайдалануға қабылданып жатқаны белгілі болды.

Бұдан бөлек, түрлі өңірлерде мердігерлердің кепілдік міндеттемелерін орындамау және қолданылған материалдардың сапасына қатысты проблемалар анықталған. Мәселен, Павлодар трассасында бетон жабыны көтеріліп кеткен. Солтүстік Қазақстан облысында жол жабындысына алынған сынамалардың 43%-ы талапқа сай болмаған. Ал Атырау мен Түркістан облыстары халық тарапынан ең көп сынға ұшыраған өңірлердің қатарында.

Жол саласына бөлінген қаржының игерілуінде де мәселе бар. Ақмола облысында игеру көрсеткіші – 56%, Ақтөбеде – 52%, Абай облысында – небәрі 42%.

Айта кетейік, 2030 жылға дейін елімізде 4 мың шақырым автожолды қайта жаңғырту жоспарланып отыр.