Байланыс операторлары мүгедектігі бар адамдарға жеңілдік беруге міндеттеледі

Байланыс оперторлары мүгедектігі бар адамдарға жеңілдікті тарифтер беруге міндеттеледі. Мәжілісте депутаттар тиісті заң жобасын екінші оқылымда мақұлдап, Сенат қарауына жіберді. 

Мәжіліс әзірлеген заң жобасы негізінде 36 заңнамалық актіге, оның ішінде 8 кодекске және 28 заңға өзгерістер мен толықтырулар енгізу көзделген.

Депутат Екатерина Смышляева заң жобасы негізінде елдің шалғай өңірлерін интернетпен қамту мүмкіндігі кеңейіп, жолдағы байланыс инфрақұрылымдарының жақсартуға мүмкіндік туатынын айтты.

Сонымен бірге депутат заң аясында байланыс саласындағы уәкілетті органның байланыс операторларын мүгедектігі бар азаматтарға жеңілдік беруді міндеттей алатынын атап өтті.

 «Мүгедектігі бар адамдарды қолдау үшін байланыс саласындағы өкілетті орган байланыс операторларының жеңілдікті тарифтер беру жөніндегі міндеттемелерін белгілейді. Сонымен бірге байланыс операторлары өз желілерінде хабарламалардың кең форматты таралуын қамтамасыз етуге міндеттеледі. Яғни біз Алматыда болған жер сілкінісі секілді төтенше жағдайларда жіберілетін хабарламалардың жылдам таратылуы туралы айтып отырмыз», – деді Смышляева.