Байланыс операторлары абоненттер туралы деректерді Ұлттық статистика бюросына беруге міндеттелмек: Тариф бағасы өсе ме?

Қазақстанда мобильді байланыс операторлары абоненттер туралы деректерді Ұлттық статистика бюросына ұсынуға міндеттеледі. Бұл түзету мемлекеттік статистика мен инновациялық қызметті қолдау жүйесін жетілдіруге қатысты заң жобасына енгізілді. Жиналатын мәліметтер тек дербестендірілмеген(мұндай ақпаратта адамның аты-жөні, ЖСН-і, мекенжайы сияқты жеке белгілері болмайды) түрде беріледі.

Бюро басшысы Мақсат Тұрлыбаевтың айтуынша, бұл шешім халықтың қозғалысын, көші-қон және туристік ағындарды талдау үшін қажет.

"Мұндай талаптар байланыс операторларына қосымша қаржылық жүктеме артуы мүмкін. Ал ол өз кезегінде тариф саясатына әсер етіп, халық үшін байланыс құнының қымбаттауына алып келуі ықтимал. Осыған байланысты басқа дереккөздерден статистикалық ақпарат алуға мүмкіндік жоқ па? Неліктен абоненттік деректерді жинауды міндетті деп есептейсіз?" – деп сауал қойды сенат отырысында депутат Алтынбек Нұхұлы.

Мақсат Тұрлыбаев бұл мәселені бюроның екі жылдан бері мобильді операторлармен бірге зерттеп келе жатқанын атап өтті. Оның айтуынша, қазір де мемлекеттік органдардан балама деректер алынып отыр. Мысалы, кеден қызметінің ақпараты бойынша 2024 жылы Қазақстанға 7,1 млн турист келген. Алайда кәсіпкерлердің есептері бойынша тек 1,3 млн турист тіркелген.

"Демек, 5 млн-нан астам турист статистикадан тыс қалып отыр. Осы санатты есепке алу үшін біз әлемдік тәжірибені қарастырдық. Көптеген елде байланыс операторларының деректері қолданылады. Бұл мәліметтер өте нақты әрі сапалы, туристердің нақты санын көрсетеді. Бізге осындай ақпарат қажет деп санаймыз. Қосымша шығындар мәселесін де қарастырып жатырмыз. Біздің ойымызша, операторларға айтарлықтай қаржылық салмақ түспейді", – деді Турлыбаев.

Сенат депутаттары «Инновациялық қызметті мемлекеттік қолдау саласын және мемлекеттік статистиканы жетілдіру мәселелері бойынша ҚР-ның кейбір заңнамалық актілеріне өзгерістер мен толықтырулар енгізу туралы» заңды екінші оқылымда мақұлдап, президенттің қол қоюына жіберді.

Құжатта сондай-ақ Astana Hub инновациялық кластерінің қызметіне қатысты түзетулер бар. Оның ішінде:

• «Astana Hub» автономды кластерлік қоры мен инновациялық кластерінің түсініктерін нақтылау;

• жаңа қордың функцияларын кеңейту және оның мүлкін қалыптастыру көздерін қайта қарау;

• шетелдік жұмыс күшін тартудың ерекшеліктері.

Сонымен қатар қайталанатын функцияларды болдырмау үшін Үкімет жанындағы Технологиялық саясат жөніндегі кеңес таратылып, оның бірқатар өкілеттігі Жоғары ғылыми-техникалық комиссияға берілмек.