Байқоңырдан Халықаралық ғарыш станциясына жаңа экипаж аттанады

Бүгін, 14 шілде күні Қазақстан уақытымен сағат 19:48-де Байқоңыр ғарыш айлағынан «Союз-2.1а» зымыран тасығышы ұшырылады. Ол Халықаралық ғарыш станциясына (ХҒС) «Союз МС-29» пилоттық кемесін жеткізуі тиіс.

«Роскосмос» мемлекеттік корпорациясының мәліметінше, 75-ші ұзақмерзімді экспедиция құрамына ресейлік ғарышкерлер Петр Дубров пен Анна Кикина және NASA астронавты Анил Менон енді. Кеме командирі болып Петр Дубров тағайындалды. Ал қосалқы экипаж құрамында Дмитрий Петелин, Константин Борисов және Дениз Бернхем бар.

Алдағы сапар ғарышкерлер үшін әртүрлі тәжірибелік кезең болмақ:

Петр Дубров үшін бұл екінші миссия. Ол бұған дейін орбитада 355 тәуліктен астам уақыт өткізіп, төрт рет ашық ғарышқа шыққан.

Анна Кикина үшін де бұл екінші ғарыштық сапар. Ол 2022 жылы америкалық Crew Dragon кемесімен ұшқан болатын. Бұл жолғы ұшу оны ресейлік «Союз» және америкалық Crew Dragon кемелерімен ғарышқа көтерілген тұңғыш ресейлік әйел-ғарышкер ретінде тарихта қалдырады.

Анил Менон болса, «Роскосмос» пен NASA арасындағы өзара ұшу бағдарламасы аясында ХҒС-қа алғаш рет аттанып отыр.

Қазіргі уақытта Байқоңырдың №31 алаңындағы ұшыру кешенінде мамандар барлық бортық жүйелерді соңғы тексеруден өткізуде. Жоспар бойынша жаңа экспедиция Халықаралық ғарыш станциясында 261 тәулік жұмыс істейді. «Союз-2.1а» зымыран тасығышы заманауи цифрлық басқару жүйесімен жабдықталған және пилоттық әрі жүк кемелерін орбитаға шығаруға арналған сенімді аппарат саналады.