Баян Алагөзова Меруерт Өтекешеваға өмір бойы ай сайын 1 млн теңге төлеуге уәде берді

Қазақстандық продюсер Баян Алагөзова актриса, Қазақстанның халық әртісі Меруерт Өтекешеваға өмір бойы ай сайын 1 млн теңге көлемінде төлем жасайтынын мәлімдеді.

Продюсер актрисаға арнап сөз сөйлеп, оны «мәңгілік Қыз Жібек» және қазақ қызының символы деп атады. Сондай-ақ ол негізін қалаған «Қазақ аруы» байқауының келесі кезеңін Меруерт Өтекешеваға арнайтынын хабарлады.

Бұдан бөлек, Баян Алагөзова актрисаға тон сыйлағанын айтты. Оның сөзінше, бұл бастама жеке алғысының белгісі ретінде ұсынылған.

Бұған дейін қоғамда «Қыз Жібек» фильмінде қолданылған камзолға қатысты пікірталас туындаған. Продюсер аталған киімнің өзінде сақтаулы екенін және оны сыйға алғанын айтқан. Мәдениет министрлігі бұл жәдігердің жеке меншікке қалай өткенін анықтауға уәде берген.

«Қыз Жібек» көркем фильмі 1969–1970 жылдары режиссер Сұлтан-Ахмет Қожықовтың жетекшілігімен түсірілген. Картина қазақтың лиро-эпостық жырының желісі бойынша жасалып, XVI–XVII ғасырлардағы тарихи кезеңді бейнелейді. Фильмдегі басты кейіпкер Қыз Жібек рөлін Меруерт Өтекешева сомдаған.