Бауыржан Момышұлына «Халық қаһарманы» атағы берілді

Президент Қасым-Жомарт Тоқаев әйгілі қолбасшы, Ұлы Отан соғысының батыры Бауыржан Момышұлына «Халық қаһарманы» атағын беру жөнінде шешім қабылдағанын хабарлады. Бұл мәлімдеме батырдың туғанына 115 жыл толған күндері жасалды.

Мемлекет басшысының айтуынша, Бауыржан Момышұлының ерлікке толы жолы тек Қазақстанда ғана емес, шет мемлекеттерде де жақсы таныс. Халық оны әлдеқашан қаһарман ретінде қадір тұтады. Соған қарамастан, осы уақытқа дейін батырға мемлекеттік деңгейде «Халық қаһарманы» атағы берілмей келген.

Президент бұл мәселені Жамбыл облысының жұртшылығы, зиялы қауым және жастар өкілдері бірнеше мәрте көтергенін атап өтіп, тарихи әділеттілікті қалпына келтіру қажеттігін айтты.

– Мемлекет басшысы ретінде Бауыржан Момышұлына «Халық қаһарманы» атағын беру туралы шешім қабылдадым. Тиісті Жарлыққа бүгін қол қойдым, бұл құжат міндетті түрде жарияланады, – деді Қасым-Жомарт Тоқаев.

Президенттің сөзінше, Бауыржан Момышұлының есімі нағыз отаншылдық пен қайсар ерліктің айқын белгісі ретінде әрдайым ұрпаққа үлгі болуы керек. Батырдың ерлігі – аңыз емес, нақты тарихи деректермен дәлелденген және соғыс жылдарын көрген өзге батырлар тарапынан да мойындалған шынайы ерлік.

Қасым-Жомарт Тоқаев елге еңбегі сіңген, ерлігімен танылған азаматтарын құрметтей білетін халықтың ешқашан ұтылмайтынын атап өтті.