Батыс Қазақстан облысындағы ірі жол апатынан екі адам қаза тауып, сегізі жарақаттанды

Батыс Қазақстан облысында бірнеше көлік соқтығысып, апат салдарынан екі адам қаза тауып, тағы сегіз адам түрлі жарақаттармен ауруханаға жеткізілді. Қайғылы жағдай халықаралық маңызы бар Ақтөбе – Астрахань тасжолында болған.

КТК телеарнасының хабарлауынша, тасжол бойында «DAF» маркалы жүк көлігі мен екі бірдей «Toyota Camry» жеңіл автокөлігі соқтығысқан. Соққының қатты болғаны соншалық, жеңіл көліктердің бірі бірден өртеніп, оның бөлшектері жол жиегіне ондаған метрге дейін шашылып кеткен. Ал ауыр жүк көлігі соқтығыстан кейін жолдан шығып, аударылған.

Полиция департаментінің алдын ала мәліметтері бойынша, апатқа үш көліктің өзара соқтығысуы себеп болған. Қазіргі уақытта маңызды жол апаты фактісі бойынша сотқа дейінгі тергеу амалдары басталды. Оқиға орнында шұғыл қызметтер мен криминалистер жұмыс істеп, трагедияның нақты мән-жайы мен себептерін анықтауда.