Баспананы ерте алу бала туу көрсеткішін екі есе арттырады - Ләззат Ибрагимова

Үкіметте өткен брифингте «Отбасы банк» АҚ басқарма төрайымы Ләззат Ибрагимова халықаралық зерттеу нәтижелеріне сүйене отырып, жастарға ерте жаста баспана беру елдегі демографиялық ахуалды жақсартуға тікелей әсер ететінін мәлімдеді. Банк басшысының айтуынша, баспанамен ерте қамтамасыз етілген отбасыларда дүниеге келетін балалар саны едәуір көп болады.

Зерттеу аясында бастапқы жарнасыз, тек ай сайынғы төлемді тұрақты өтеу шартымен баспана ұсынылғанда, 20-25 жас аралығындағы азаматтардың балалы болу ықтималдығы 32 пайызға артқан. Ал 20 жастан асқанда баспаналы болғандардың жалпы бала саны 30 немесе 40 жаста үй алғандармен салыстырғанда екі есе жоғары екені анықталды. Сондай-ақ 40 жастан асқан азаматтарға баспана берілгенде мұндай демографиялық өсім байқалмаған.

Сонымен бірге Ләззат Ибрагимова болашақта ипотекалық қарыздарды бөлу кезінде үміткердің және оның ата-анасының баспанамен қамтылу деңгейі ескерілуі мүмкін екенін жеткізді. Мәселен, ата-анасы ауылда тұратын азаматтарға мегаполисте пәтері бар отбасыларға қарағанда басымдық беру ұсынылуда. Бұл бағытта әділ жүйе қалыптастыру үшін жасанды интеллект пен үлкен деректерді (Big Data) өңдеу технологиялары қолданылмақ.