«Баспана береміз»: Қаржы пирамидасының уәдесіне сенген 500-ден аса адам 50 млн теңгеден айырылды

Алматыда 515 адамды алдап, 50 миллион теңгеден астам қаражатты жымқырған «Uili Bolayik» атты қаржы пирамидасы әшкереленді. Бұл туралы Қаржылық мониторинг агенттігі хабарлады.

Агенттіктің мәліметінше, ұйымдастырушылар азаматтарға «артық төлемсіз, әлеуметтік бағдарлама аясында баспана алуға болады» деп уәде берген. Сонымен қатар салымшыларға ай сайын 15–30% табыс және әрбір тартылған қатысушы үшін 10% бонус берілетіні айтылған.

Алайда жиналған қаржы күдіктінің жеке шотына түсіп отырған, ал «Uili Bolayik қайырымдылық қорының» шоты мүлде қолданылмаған. Қор шотында ақша қозғалысы тіркелмеген.

Сот шешімімен күдіктінің банк шоттары бұғатталды, ал өзіне елден шығуға тыйым салу түріндегі бұлтартпау шарасы қолданылды. Тергеу жалғасып жатыр.