Бас редакторлар клубы мен ҚХА журналистер клубы этносаралық келісім тақырыбында Меморандумға қол қойды

Алматыда Бас редакторлар клубы мен Қазақстан халқы Ассамблеясы журналистер клубы арасында бұқаралық ақпарат құралдарында этносаралық қатынастарды жариялау мәдениетін дамыту жөнінде Меморандумға қол қойылды.

Бұл туралы Сенат депутаты, Бас редакторлар клубының президенті Бибігүл Жексенбай өзінің Facebook парақшасында хабарлады.

«Мақсат – этносаралық қатынастарды БАҚ-та жариялау мәдениетін қалыптастыру және бұл бағытта бірлесе жұмыс істеу. Көпэтносты Қазақстан үшін БАҚ-тың рөлі айрықша. Әрбір сөз, әр жарияланым қоғамдағы сенім мен татулыққа әсер етеді», – деп жазды сенатор.

Бибігүл Жексенбай журналистердің кәсіби этикасы – тек мамандық талабы емес, қоғамдық келісім мен ұлттық қауіпсіздіктің кепілі екенін атап өтті.

«Бүгінде көптеген елдер этносаралық тақырыптар бойынша нақты этикалық нормалар енгізген. Мәселен, Ұлыбританияда Ofcom өшпенділік тіліне жол бермейді, Канадада журналист осы бағыттағы “нәзік” тақырыптарды этностық топтармен кеңесіп барып жазады; Еуропа Кеңесінің хартиясында: “Журналист қоғамды бөлуге емес, түсіністікке қызмет етуі тиіс” деп көрсетілген. Бұл – жауапты журналистиканың ортақ қағидаты», – деді ол.

Кездесу барысында тараптар БАҚ-та этносаралық және діни тақырыптарды жариялауға арналған Этикалық кодекс қабылдау, медиа кеңес құру және журналистика факультеттерінде «Толеранттылық және медиаэтика» пәнін енгізу мәселелерін талқылады.

«Бұл бастамалар сөз бостандығын шектеу емес, керісінше қоғамдағы сенім мен кәсібилікті арттыру тетігі», – деп түйіндеді Бибігүл Жексенбай.

Сенатор өз жазбасын халық даналығымен қорытындылады.

«Халқымыз “Бірлік бар жерде – тірлік бар” дейді. Ақпараттық дәуірде бұл қағида бұрынғыдан да маңызды. Біздің міндетіміз – сөз арқылы келісім мен өзара құрметті нығайту», – деп жазды ол.