Бас прокуратура Нұрлан Сабыровқа қатысты тексеріс жүргізуі мүмкін

Қазақстан Бас прокуратурасы әзілкеш Нұрлан Сабыровқа қатысты «жалдамалылық» бабы бойынша тексеріс жүргізуі мүмкін. Бұл туралы Бас прокурордың орынбасары Ғалымжан Қойгелдиев мәлімдеді.

Оның айтуынша, Қазақстан заңнамасына сәйкес шетелдегі қарулы қақтығыстарды қаржылай немесе өзге де түрде қолдау қылмыстық жауапкершілікке әкеп соғады. Аталған бап бойынша 12 жылға дейін бас бостандығынан айыру жазасы қарастырылған.

Бұқаралық ақпарат құралдарының хабарлауынша, тексеріске 2025 жылдың жазында Ресейдің Истра қаласы басшысы Татьяна Викушева жариялаған жазба түрткі болған. Онда Истра ауданында тұратын Сабыров соғыс аймағына 10 мотоцикл жібергені айтылған.

Жазбада «Ресей қаһарманы Ратибордың қарамағындағы “Вагнер Истра Легионы” жауынгерлеріне 10 питбайк жіберілді» деген мазмұн болған. Кейін бұл жарияланым өшірілгенімен, оның көшірмелері әлеуметтік желілерде сақталғаны айтылады.

Айта кетейік, биыл 6 ақпанда Нұрлан Сабыров Мәскеудегі Внуково әуежайында тоқтатылып, Ресейге кіруіне 50 жылға тыйым салынғаны хабарланған. Әзілкеш Қазақстанға оралған соң әлеуметтік желідегі жазбаларын өшіріп, оқиғаға қатысты пікір білдіруден бас тартты. Оның сөзінше, мәселемен заңгерлері мен құзырлы органдар айналысып жатыр.