Бас прокуратура «Ескі Қазақстан» өкілдерінің Эпштейнмен ықтимал байланыстарын тексере бастады

Қазақстан Бас прокуратурасы америкалық қаржыгер Джеффри Эпштейннің жарияланған материалдарына байланысты тексеру бастады. Құжаттарда бұрын Ұлттық қауіпсіздік комитетін басқарған, кейін Премьер-министр қызметін атқарған Кәрім Мәсімовтің есімі аталады.

Бұл туралы Ақордада журналистерге Бас прокурор Берік Асылов мәлімдеді.

– Кәрім Мәсімовке қатысты алдын ала тексеру басталды. Эпштейн Қазақстанға келді ме, осы бағытта да тексеру жүргізіліп жатыр, – деді Асылов.

Эпштейн құжаттарында Мәсімовтің есімі сегіз рет аталғаны хабарланған. Алайда АҚШ-та жарияланған материалдар олардың жеке кездескен-кездеспегенін нақты көрсетпейді.

Еске салайық, 2023 жылдың сәуірінде Кәрім Мәсімов мемлекеттік сатқындық, билікті басып алуға әрекет жасау және лауазымдық өкілеттігін асыра пайдалану баптары бойынша 18 жылға сотталған.

Бас прокуратура Эпштейннің хат алмасу материалдарында аталған «Ескі Қазақстан» кезеңіндегі өзге саясаткерлердің де байланыстарын тексеріп жатыр.

Бұған дейін Мәжілістегі ОСДП фракциясының депутаты Асхат Рақымжанов Бас прокурор мен ҰҚК төрағасына депутаттық сауал жолдап, «Эпштейн файлдарында» аталған қазақстандық азаматтардың америкалық қаржыгермен байланысын анықтауды сұраған.

Сондай-ақ депутат АҚШ-та қаза тапқан қазақстандық модель Руслана Коршунованың өліміне қатысты мән-жайды да тексеруді ұсынған. Осындай талаппен Мәжіліс депутаты Бақытжан Базарбек те шыққан.