Банктер енді несие алушының туыстарынан кепілгер болуды талап ете алмайды

Мәжілісте қаралып жатқан «Банктер туралы» заң жобасына банктердің азаматтардан жеке кепілгерлік талап етуіне шектеу қоятын маңызды түзету енгізілді. Бұл туралы Мәжіліс депутаты Тимур Қырықбаев өзінің Facebook парақшасында хабарлады.

Депутаттың айтуынша, қазіргі уақытта жеке кепілгерлік азаматтар үшін ауыр әрі әділетсіз тәжірибеге айналған.

«Көп жағдайда несие ала алмай отырған адамның туыстары немесе таныстары оның орнына төлем жасау мүмкіндігі болмаса да, артық міндеттемелерге қол қоюға мәжбүр болады. Мұндай жағдайлар кейін кепілгерлерге үлкен ауыртпалық түсіріп, олардың өмірін күрделендіреді», – деп жазды Қырықбаев.

Сонымен қатар ол телефон арқылы қашықтан рәсімделетін кепілгерлік кезінде адамдар өз міндеттемелерін толық түсінбей қалатынын атап өтті.

Осыған байланысты депутат «Банктер туралы» заңның 54-бабына түзету енгізуді ұсынған. Енді банктер:

– кепілгердің қаржылық жағдайын міндетті түрде бағалауға;

– кепілгердің міндеттемелердің көлемімен жазбаша түрде танысып, келісім беруін қамтамасыз етуге;

– ал егер ұсынылған қамтамасыз ету негізгі қарызды толық өтейтін болса, қосымша кепілгерлік немесе кепіл талап етпеуге міндетті болады.

«Егер кепіл банктің саясатына сай негізгі қарызды толық өтей алатын болса, онда банктің жеке тұлғадан қосымша кепілгерлік сұрауға құқығы жоқ», – деді депутат.

Түзетуге сондай-ақ Мәжіліс депутаттары Бақытжан Базарбек пен Айдос Баққожаев қол қойған.