“Банктен хабарласып тұрмыз”: алаяқтар енді алдай алмайды

Қазақстанда банктер мен мемлекеттік органдардан келетін қоңырауларды міндетті түрде белгілеу мәселесі қаралып жатыр. Бұл туралы Жаслан Мәдиев мәлімдеді.

Жаңа тәсілге сәйкес, қоңырау түскен кезде телефон экранында тек нөмір емес, қоңырау шалған ұйымның ресми атауы көрсетіледі. Бұл алаяқтардың азаматтарды «банктен хабарласып тұрмыз» деп алдауын болдырмауға бағытталған.

Министрдің айтуынша, заңды тұлғалардан келетін барлық қоңырауларға міндетті таңбалау енгізу ұсынылып отыр. Қазіргі уақытта тиісті заңнамалық өзгерістер талқылануда.

Сонымен қатар құжатта құрылғыларды верификациялау жүйесін өзгерту қарастырылған. Бұған дейін бұл жүйені жеке компания жүзеге асырса, енді оны Цифрлық даму және жасанды интеллект министрлігі бақылауына беру жоспарланып отыр.

Мамандардың пікірінше, бұл шаралар алаяқтық қоңыраулар санын азайтып, азаматтардың қаржылық қауіпсіздігін күшейтуге мүмкіндік береді.