Банк қосымшаларына кіру үшін жаңа талаптар пайда болды

Қазақстанда екінші деңгейлі банктер, микроқаржы ұйымдары және жекелеген банк операцияларын жүзеге асыратын мекемелер үшін биометриялық аутентификациядан өткізудің жаңартылған талаптары ресми түрде қолданысқа енгізілді.

Жаңа ережелерге сәйкес, биометриялық тексеру клиенттің бет-әлпетінің кескіні бойынша жүргізіледі. Бұл процесс бірнеше негізгі кезеңнен тұрады: құрылғы камерасы арқылы нақты уақыт режімінде кескінді алу, идентификациялық деректерді жинақтау және ағымдағы кескінді эталондық үлгімен салыстыру.

Алаяқтық әрекеттердің алдын алу мақсатында цифрлық тексеріс кезінде "жандылықты тексеру" (liveness detection) тетігі күшейтілді. Енді клиент камера алдында жүйе ұсынған кемінде үш кездейсоқ команданы орындауы тиіс. Оның ішінде басты бұру, көзді жұму немесе мимиканы өзгерту сияқты тапсырмалар болуы мүмкін. Видео ағынды талдау барысында сәйкессіздік анықталса, процедура қайталанады. Үш рет сәтсіз әрекет тіркелген жағдайда, клиент тексеруден өтпеді деп танылады.

Жаңа талаптар цифрлық сервистерге деген сенімді нығайтуға және клиенттердің қаражатын қорғауға бағытталған. Техникалық қауіпсіздікті қамтамасыз ету үшін идентификация кезінде берілетін барлық деректер шифрланады. Сонымен қатар қолданылатын бағдарламалық жасақтамалардың деректерді қолдан жасаудан немесе кибершабуылдардан қорғалуына ерекше назар аударылады.

Биометриялық аутентификацияның сәтті өткені туралы қорытынды шешімді ішкі критерийлер мен тексеру нәтижелеріне сүйене отырып, қаржы ұйымының өзі қабылдайды.