Балқашта көпқабатты үйдің подъезі опырылып түсті

Балқаш қаласында бейсенбі күні таңғы сағат 08:00 шамасында көпқабатты тұрғын үйдің бір подъезі опырылып құлады. Қала әкімдігінің мәліметінше, аталған подъезд өткен жылы апатты деп танылған.

Әкімдік өкілдерінің хабарлауынша, үйдің бесінші подъезі 2025 жылы жарамсыз деп танылып, онда тұратын тұрғындар көшірілген. Пәтерлері тұруға жарамсыз деп танылған азаматтар баспанаға мұқтаждар ретінде кезекке қойылған.

Қазіргі уақытта ғимарат қоршауға алынып, электр қуаты, жылу және су беру тоқтатылған. Апатты бөлік бұзылып жатыр. Жұмыстар аяқталғаннан кейін қалған төрт подъезге қосымша техникалық тексеріс жүргізіліп, сараптама жасалады.

Қауіпсіздік шаралары аясында қалған төрт подъезден шамамен 120 отбасы уақытша эвакуацияланды. Қала билігі оларды уақытша орналастыру мәселесін қарастыруда.

Әкімдіктің мәліметінше, бұзу жұмыстары аяқталған соң мамандар ғимараттың қалған бөліктерінің техникалық жағдайын бағалайды. Егер конструкциялар қауіпсіз деп танылса, тұрғындарға үйлеріне қайта оралуға рұқсат беріледі.

Сонымен қатар жақын уақытта қалған конструкцияларды күшейтуге арналған жобалық-сметалық құжаттама әзірленбек.