Баласын қазақ сыныбына беретін өзге ұлт өкілдері көбейді

Елімізде бірінші сыныпқа құжат қабылдау науқаны жалғасып жатыр. Оқу-ағарту министрлігінің мәліметінше, жаңа оқу жылында 380 мыңнан астам бала мектеп табалдырығын аттайды деп күтілуде. Қазіргі уақытта бұл көрсеткіштің 84 пайызға жуығы, яғни 320 мыңға жуық бала тіркеуден өтті.

Тіркелген оқушылардың 71 пайызға жуығы оқыту қазақ тілінде жүргізілетін сыныптарды таңдаған. Елеулі тенденциялардың бірі - мемлекеттік тілде білім алуға деген қызығушылықтың артуы. Мәселен, өзге ұлттың 2 мыңнан астам баласы қазақ тіліндегі сыныптарға жазылған.

Негізгі көрсеткіштер мен аймақтық бөлініс:

Оқушылардың 71%-дан астамы қазақ сыныптарын, 26%-дан астамы орыс сыныптарын, ал 2,5%-ы басқа тілдерді таңдаған. Тіркелгендердің 296 мыңы мемлекеттік, 23 мыңға жуығы жекеменшік мектептерде білім алады. Сонымен қатар ерекше білім беру қажеттіліктері бар 4 мыңға жуық бала мектепке қабылданды.

Демографиялық өсімге байланысты ең көп бірінші сынып оқушылары Түркістан (50 мыңнан астам) мен Алматы (35 мыңнан астам) облыстарында, сондай-ақ Астана (33 мың), Алматы (31 мыңнан астам) және Шымкент (29 мыңнан астам) қалаларында байқалады.

Құжаттарды қабылдау 31 тамызға дейін кезең-кезеңімен жүргізіледі. Ата-аналардың 84 пайызға жуығы өтінішті eGov.kz порталы немесе eGov Mobile қосымшасы арқылы онлайн түрде жолдаған.