«Баланың жаны шығып бара жатқанын түсіндіңіз бе?»: үш жасар қыздың өлімі бойынша сотта жаңа деректер айтылды

Астанада тіс емдеу кезінде көз жұмған үш жасар қыздың өліміне қатысты сот процесі жалғасып жатыр. Бүгінгі отырыста оқиға күнгі бейнежазбалар көрсетіліп, тараптар түсініктеме берді. Бұл жөнінде Azattyq Rýhy хабарлады.

Жәбірленуші тараптың адвокатының айтуынша, айыпталушы анестезиолог жедел жәрдем шақырудың орнына өзіне таныс дәрігерді көмекке шақырған.

«Иә, мен әріптесімді шақырдым. Біз бұрын кардиохирургиялық орталықта бірге істегенбіз. Сол кезде шұғыл көмек қажет болды, ал жалғыз өзіме қиын болатынын түсіндім. Сондықтан тәжірибелі әріптесімді шақырдым. Ол да реаниматолог», – деді сотта айыпталушы Гүлжан Жұмағалиева.

Судья «Неліктен бірден жедел жәрдем шақырмадыңыз?» деп сұрағанда, дәрігер бұл шешімін былай түсіндірді.

«Жедел жәрдем құрамында реаниматолог болмайды, олар көбіне науқасты ауруханаға жеткізумен айналысады. Ал бізге сол сәтте кеңейтілген реанимациялық көмек қажет болды. Мен және әріптесім — реаниматологпыз, кәсіби деңгейде көмекті дереу бастадық», – деді ол.

Алайда жәбірленуші тараптың адвокаты реанимация кезінде дефибриллятор қолданылмағанын сынға алды.

«Жүрек тоқтағаннан кейін дефибриллятор күйік қалдыруы мүмкін. Сол себепті оны қолданған жоқпыз», – деп жауап берді Жұмағалиева.

Сот төрағасы «Баланың жаны шығып бара жатқанын түсіндіңіз бе?» деп нақтылады.

«Иә, жүрек тоқтады. Биологиялық өлім тіркелмегенімен, толық кардиостоп болды», – деді дәрігер.

Судьяның мәліметінше, анестезиолог жедел жәрдемді жүрек соғысы тоқтағаннан кейін тек төрт минут өткен соң ғана шақырған.

Айта кетейік, бұл іс елордада болған үш жасар қыздың тіс емдеу кезінде көз жұмған трагедиясына қатысты. Әкесі қызын жеке стоматологияға апарған, онда дәрігерлер анестезиямен бір мезетте 18 тісін емдеуді жоспарлаған.

Прокурор Еркебұлан Шалқаровтың айтуынша, кейінгі жоспардан тыс тексеру кезінде клиникада анестезияға дайындық, медициналық жабдықтау және қауіпсіздік стандарттарының өрескел бұзылғаны анықталған. Сондай-ақ шұғыл көмекке арналған қажетті құрал-жабдықтардың жеткіліксіз болғаны белгілі болды.

Қазір сот процесі жалғасып жатыр. Қыздың туыстары дәрігерлердің немқұрайлығы мен кәсіби жауапсыздығы баланың өліміне себеп болды деп есептейді.