Баланың еміне деп 1,3 млрд теңге жинаған: Астанада ерлі-зайыпты сотталды

Астанада сот Дәулет пен Толқын Тотақановтарды аса ірі көлемде алаяқтық жасағаны және қылмыстық жолмен алынған ақшаны заңдастырғаны үшін кінәлі деп таныды.

Тергеу нұсқасына сәйкес, ерлі-зайыпты ауыр дертке шалдыққан ұлын емдеуге қаражат жинау мақсатында қайырымдылық науқандарын ұйымдастырған. Алайда жиналған 1,3 млрд теңгеден астам қаржының тек 6,4 млн теңгесі ғана емге жұмсалған. Қалған қаражат қайырымдылық жинақтарын жарнамалауға, жылжымайтын мүлік пен автокөлік сатып алуға, сондай-ақ бәс тігуге бағытталғаны анықталған.

Мемлекеттік айыптаушы соттан ерлі-зайыптыларға жеті жыл бас бостандығынан айыру жазасын тағайындауды сұраған. Сонымен бірге, кәмелетке толмаған баласының болуына байланысты Толқын Тотақановаға жаза өтеуді екі жылға кейінге шегеру ұсынылған. Сот бұл өтінішті қанағаттандырып, екі сотталушыға да жеті жылға бас бостандығынан айыру жазасын белгіледі. Әйел адамға қатысты үкімнің орындалуы екі жылға кейінге қалдырылды.

Сот шешімімен Тотақановтарға 10 жыл мерзімге қайырымдылық қызметпен, соның ішінде қаражат жинаумен айналысуға тыйым салынды. Сондай-ақ олардың мүлкі тәркіленді.

Соңғы сөзінде Толқын Тотақанова жиналған қаражатты тек ұлын емдеуге жұмсағанын айтып, пайыздық қарыз берушілердің құрбаны болғанын мәлімдеді. Ол сондай-ақ жұбайының ақшаны жұмсауға қатысы болмағанын алға тартты.