«Балама буллинг жасаған»: Құлсарыда балтамен шабуылдаған оқушының анасы ұлының әрекетін түсіндірді

Құлсары қаласындағы №6 мектепте балтамен жасалған шабуылға қатысты оқушының анасы оқиғаның біржақты бағаланып жатқанын мәлімдеді. Оның айтуынша, ұлы ұзақ уақыт қатарластарының қысымына ұшыраған. Бұл жөнінде КТК арнасы хабарлады.

Анасының сөзінше, буллинг бір жылдан бері жалғасқан.

«Екі жақты қарау керек. Буллинг болып тұр. Бұл балалар бір жылдан бері тиісіп жүрген көрінеді. Бала өзі төрт балаға әлі келмейтіндіктен, осындай балалықпен жұмыс жасайды. Ешқандай ата-ана мектепке балтамен бар деп айтпайды. Ол менің жалғыз түйір балам», — дейді Мәншүк Жиенбетова.

Сондай-ақ әйел баласының мектепке балтаны әдейі апармағанын, оны далада тауып алғанын айтты.

Алайда мектептегі бірқатар ата-ана бұл уәжбен келіспейтінін білдірді. Олардың пікірінше, қолына балта ұстап шабуыл жасаған оқушының қайтадан сабаққа қосылуы өзге балалардың қауіпсіздігіне қатер төндіреді.

Ата-аналардың айтуынша, бұрын пышақ секілді жасырын әкелінетін құралдардың өзі алаңдатса, енді ашық түрде балта әкелінуі жағдайдың күрделілігін көрсетеді.

«Пышақ дейтін былай қалды, балтамен шабамыз. Бұрын көрінбейтін қару — пышақты ұстайтын еді. Енді нән балтаны апарып тұр. Түсінігі дұрыс емес болып тұр ғой. Бұл жерде әр жастағы бала оқиды. Қазір жазатайым кетіп бара жатып, бір балаға тиіп кетеді. Болғаннан кейін не керек?! Ол бала бір жағынан «бізге бұзақылық жасай беруге болады, ертең директорды ауыстырып жібереді» деп ойлайды. Бұнымен проблема шешілмейді», – дейді ата-аналардың бірі Елена Сарбалина.

Ал мұғалімдер қауымы аталған 10-сынып оқушысы бұған дейін де мектепішілік бақылауда болғанын айтады. Ұжым өкілдерінің сөзінше, ата-анасына бірнеше мәрте ескерту жасалған.

Қазір ата-аналар мен ұстаздар мәселені Оқу-ағарту министрлігі деңгейінде қарауды сұрап отыр. Олар балалардың қауіпсіздігін қамтамасыз ететін нақты шешім қабылдануы тиіс деп санайды.

Еске салайық, 5 ақпанда Құлсары қаласындағы №6 мектепке 10-сынып оқушысы балтамен келіп, екі оқушыны жарақаттаған. Оқиғадан кейін қылмыстық іс қозғалып, жасөспірім уақытша ұстау изоляторына қамалған. Кейін тергеу судьясының шешімімен ол үйқамаққа жіберілді.

Жылыой ауданы прокуратурасы бұл шешіммен келіспей, облыстық сотқа өтінішхат жолдағанын мәлімдеді. Қадағалаушы орган істің мән-жайы қайта қаралатынын хабарлады.

Ал мектеп директоры қызметінен босатылған. Мұғалімдер мен ата-аналардың бір бөлігі бұл шешімге қарсылық білдіріп, бұрынғы басшыны қызметіне қайтаруды сұрап отыр.

Құзырлы органдар тергеу амалдары жалғасып жатқанын мәлімдеді.