Балаларды шетелге емдеуге жіберу 50%-ға қысқарады

Қазақстанда жоғары технологиялық медициналық көмекті дамыту арқылы балаларды шетелдік клиникаларға жіберу қажеттілігі 50%-ға төмендетіледі. Бұл туралы Үкімет отырысында Денсаулық сақтау министрі Ақмарал Әлназарова мәлімдеді.

Министрдің айтуынша, соңғы үш жылда отандық медицинада бірқатар озық технология енгізіліп, соның нәтижесінде шетелге емделуге жіберілетін балалар саны айтарлықтай азайған. Атап айтқанда, туыс емес донордан бағаналы жасуша трансплантациясына жолдау 3 есеге, ал кардиохирургиялық емге жіберу 5,2 есеге қысқарған. Қазіргі таңда жыл сайын 2 мыңнан астам балаға жүрекке күрделі операция жасалып, туа біткен ақаулар дер кезінде түзетілуде.

Биыл елімізде протондық терапия, йодтерапия және тамырлы ақауларды емдеу әдістері толық қолжетімді болады. Сонымен қатар ми ісіктері мен тамыр патологияларын бір сатылы емдеуге арналған гибридті операциялық бөлмелер енгізіліп жатыр. Осы жаңғырту аясында 36 балаға «гамма-пышақ» аппаратында радиохирургиялық операциялар жасалған.

Сондай-ақ жыл сайын 400 балаға есту импланттары орнатылады, ал 700-ге жуық шала туған нәрестеге ретинопатияны түзету бойынша медициналық көмек көрсетіледі. Министрдің айтуынша, жоспарланған барлық шаралар кешені балаларды шетелде емдеуге жіберу қажеттілігін екі есеге азайтып, жоғары технологиялық медициналық көмекті ел ішінде алуға мүмкіндік береді.