Балалар үйіндегі дау: Президент әкімшілігі тексерісті бастады

Алматыдағы №1 облыстық балалар үйіне Мемлекет басшысы Әкімшілігінің комиссиясы келді. Бұл туралы Президент Әкімшілігінің баспасөз қызметі хабарлады. Комиссия балалар үйіндегі жағдайды жан-жақты және объективті түрде тексеру мақсатында жұмысын бастады.

"Комиссия мүшелері тәрбиеленушілермен, мекеме басшылығымен және қызметкерлерімен, сондай-ақ білім беру жүйесінің өкілдерімен кездесті. Тексеру барысында Президент Әкімшілігінің өкілдері балалардың тұрмыс және оқу жағдайымен танысып, инфрақұрылым нысандарын аралады. Қазіргі уақытта балалар үйін көшіру туралы шешімге байланысты құжаттар жиналып, талданып жатыр", – делінген ресми хабарламада.

Комиссия ерекше назарды ата-ана қамқорлығынсыз қалған балаларға заңмен бекітілген әлеуметтік және құқықтық кепілдіктердің орындалуына аудармақ. Әкімшілік бұл тексерудің басты мақсаты – балалардың құқықтары мен мүдделерін қорғау екенін атап өтті.

Еске сала кетейік, 2025 жылғы наурызда аталған балалар үйінің тәрбиеленушілері әлеуметтік желі арқылы видеоүндеу жасап, өздерін Конаев қаласына күштеп көшіріп жатқанын айтқан болатын. 21 шілдеде көшіру процесі басталып, полицейлер балаларды күштеп шығарып жатқан сәттің видеосы таралды. Осыдан кейін Президент көшіруді тоқтатып, қызметтік тергеу жүргізуді тапсырды.