Балалар спортына бөлінетін ақша екі есеге жуық өсті: Тоқаев кімдердің қалтасын бақылауға алды?

Қазақстандық балалар спорты мен туризм саласында үлкен өзгерістер күтіп тұр. Мемлекет басшысы Қасым-Жомарт Тоқаев саланың тамырына қан жүгіртіп, бюджет ақшасының тиімді жұмсалуын қадағалайтын маңызды заңға қол қойды. Ең басты сенсация - балалар мен жасөспірімдер спорт мектептерін (ДЮСШ) қаржыландырудың мүлдем жаңа жүйесіне көшуі.

Енді бір спортшыға бөлінетін жылдық шығын 233 мың теңгеден 415 мың теңгеге дейін бір-ақ секірді. Бұл - жаттығу сапасы мен жабдықтардың жақсаратынының кепілі. Сонымен қатар, бұдан былай спортқа бөлінетін бюджеттен тыс қаражатты үлестіретін бірыңғай оператор жыл сайын міндетті аудиттен өтеді. Бұл қадам «ақша қайда кетті?» деген сұрақтың туындауына жол бермей, ашықтықты қамтамасыз етпек.

Туризм саласында да бизнес үшін «майлы шелпек» табылды. Енді мемлекет туристік нысандардағы санитарлық-гигиеналық тораптарды күтіп ұстау шығындарын субсидиялайды. Яғни, жол бойындағы әжетханалардың жағдайы енді мемлекет бақылауында болады. Бұған қоса, қонақ үйлер мен визит-орталықтар салған кәсіпкерлерге кеткен шығынының бір бөлігі қайтарылады. Министрлікке туристік өнімнің сапасына қойылатын талаптарды күшейту құзыреті берілді. Бұл шаралардың барлығы еліміздегі демалыс мәдениетін жаңа деңгейге көтеріп, балалардың спортқа қолжетімділігін арттыруға бағытталған.