Балаева Шаханов пен Рахмонов атынан фейк таратқандарға ескерту жасады

Премьер-министрдің орынбасары – мәдениет және ақпарат министрі Аида Балаева әлеуметтік желілерде белгілі тұлғалардың атынан таралып жатқан арандатушылық ақпаратқа қатысты мәлімдеме жасады.

«Кейбір әлеуметттік желі қолданушылары жағдайды теріс мақсатта пайдаланып, еліміздегі қоғамдық-саяси ахуалды тұрақсыздандыруға бағытталған әрекеттерге баруда. Арандатушылар негізсіз ақпарат таратып, жалған парақшалар мен аккаунттар ашқан (мысалы, Мұхтар Шахановтың, Шавкат Рахмоновтың және өзге де тұлғалардың атынан ашылған фейк-аккаунттар арқылы тіл, жерді сату секілді мәселелер бойынша арандатушылық ақпарат пен үндеулер жариялануда)», – деді министр.

Оның айтуынша, елде ірі митингілер мен жаппай наразылық акциялары өтіп жатыр деген жалған хабарлар да таралып, Конституцияның жекелеген баптары әдейі бұрмаланып түсіндіріліп жатыр.

«Бұдан бөлек, бұқаралық ақпарат құралдары мен танымал парақшаларға техникалық шабуылдар жасалып жатқаны туралы да хабарлар түсіп отыр. Қазіргі уақытта уәкілетті орган ретінде біз бұл жағдайды жан-жақты зерделеп, тиісті шаралар қабылдап жатырмыз», – деп толықтырды Аида Балаева.

Вице-премьер азаматтарды тек ресми дереккөздерге сенуге шақырып, жалған ақпарат таратудың заң алдындағы жауапкершілікке әкелетінін ескертті.