Бала күтімімен отырған жұмыс істемейтін әкелердің еңбек өтілі есепке алынатын болды

Қазақстанда әлеуметтік заңнамаға енгізілген жаңа өзгерістер аясында жұмыс істемейтін әкелердің бала күтіміне жұмсаған уақыты зейнетақы тағайындау кезінде еңбек өтілі ретінде есептеледі. Бұл норма Конституциялық соттың қаулысын іске асыру мақсатында Әлеуметтік кодекске енгізілді. Енді кәмелетке толмаған балаларға нақты күтім жасаған әкелердің осы кезеңі олардың жасына байланысты зейнетақы төлемдерін есептеу барысында ресми жұмыс өтілі болып саналады.

Сонымен қатар, заңнамадағы маңызды жаңалықтардың бірі – «жалғызбасты ана» ұғымының «жалғызбасты ата-ана» болып өзгеруі. Депутаттардың бастамасымен енгізілген бұл түзету жынысына қарамастан, баланы жалғыз тәрбиелеп отырған ата-аналардың құқығын теңестіреді. Бұл өзгеріс бойынша енді жұмыс берушілерге жалғызбасты әкелерді де өз бастамасымен жұмыстан шығаруға заң жүзінде тыйым салынады. Бұл шаралар отбасы институтын нығайтуға және бала тәрбиесіндегі әкелердің рөлін құқықтық деңгейде қорғауға бағытталған.