Бала асырап алуға қойылатын талаптар күшейеді

Оқу-ағарту министрлігі әзірлеген түзетулерге сәйкес, жетім балаларды және ата-ана қамқорлығынсыз қалған балаларды асырап алу кезінде отбасылық жұптарға басымдық беріледі. Сонымен бірге бала асырап алушыларға қойылатын талаптар күшейтіледі.

«Конституциялық соттың 2024 жылғы 23 маусымда қабылдаған нормативтік қаулысын орындау шеңберінде министрлік жетім балаларды және ата-ана қамқорлығынсыз қалған балаларды отбасылық жұптардың тәрбиелеуіне басымдық беруді көздейтін бірқатар заңнамалық нормалар әзірледі», – деді Оқу-ағарту вице-министрі Еділ Оспан.

Сонымен қатар бала асырап алушы үміткерлер жыл сайын соттылығы туралы деректерді жаңартып, міндетті түрде психологиялық диагностикадан өтуі және кәсіби қабылдаушы отбасылар сияқты аккредиттелген ұйымдарда оқудан өтуі қажет.

«Қазіргі уақытта бұл түзетулер мемлекеттік органдардың қарауында. Келісілгеннен кейін олар Парламентке енгізіледі», – деп толықтырды Оспан.

Сенатор Нұрия Ниязова Конституциялық соттың ер адамдарға некеде тұрмай бала асырап алуға тыйым салатын «Неке және отбасы туралы» кодекстің 91-бабының нормасын конституциялық емес деп танылғанын еске салды. Сонымен бірге сенатордың айтуынша, балаларға қатысты құқық бұзушылықтардың, соның ішінде жыныстық зорлық-зомбылықтың саны жыл сайын артып келеді.

2024 жылдың 11 айында кәмелетке толмағандардың жыныстық тұтастығына қатысты 890 құқық бұзушылық тіркелді, бұл 2023 жылдың осы кезеңімен салыстырғанда 8%-ға көп. Бас прокуратураның құқықтық статистика және арнайы есепке алу жөніндегі комитетінің мәліметі бойынша, мұндай құқық бұзушылықтардың 99%-ын ер адамдар жасайды.