Баку төрiнде қазақ ақыны Саят Қамшыгердің жаңа кітабы таныстырылды

Әзербайжан астанасы Баку қаласындағы Ұлттық ҮЕҰ форумының штаб-пәтерінде белгілі қазақ ақыны, Халықаралық «Алаш» әдеби сыйлығының лауреаты Саят Қамшыгердің әзербайжан тіліне аударылған «Qarabaq» поэма-кітабының салтанатты тұсаукесері өтті.

Халықаралық іс-шара Дүниежүзілік жас түркі жазушыларының одағы мен «Өңірлік құқықтық және экономикалық ағартушылық» қоғамдық бірлестігінің ұйымдастыруымен жүзеге асырылды. Жиын Қазақстан мен Әзербайжан арасындағы мәдени-рухани байланыстарды нығайту және Түркі әлеміндегі ортақ әдеби платформаны дамыту тұрғысынан маңызды оқиға ретінде бағаланды.

Тұсаукесер рәсіміне Қазақстан Республикасының Әзербайжандағы Төтенше және өкілетті елшісі Әлім Байел қатысып, құттықтау сөз сөйледі. Елші өз сөзінде екі мемлекет арасындағы қатынастардың стратегиялық әріптестік деңгейінде қарқынды дамып келе жатқанын атап өтті.

«Мәдени-әдеби жобалар — халықтар арасындағы рухани жақындасудың ең тиімді құралы. Мұндай туындылар біздің бауырластығымызды бекемдей түседі», — деді Әлім Байел.

Сондай-ақ, елшінің Әзербайжанның азат етілген аумақтарындағы қайта қалпына келтіру жұмыстарына Қазақстан тарапынан көрсетіліп жатқан қолдау туралы мәлімдемесі жиналғандар тарапынан зор қошеметпен қабылданды.

Әзербайжандық ақын Әкбар Қошалы шығарманың идеялық-эстетикалық ерекшеліктеріне тоқталып, Қарабақ тақырыбының қазіргі түркі әдебиетіндегі жаңа мазмұндық қырларын талдап берді. Ол поэманы «түркі рухы мен ортақ тарихтың көркем көрінісі» деп сипаттады.

Халықаралық Түркі мәдениеті және мұрасы қорының аппарат басшысы Фахри Валехоғлу мен Мемлекеттік қолдау агенттігінің Бақылау кеңесінің төрағасы Фуад Мамедов туындының халықаралық мәдени интеграцияға қосатын үлесіне жоғары баға берді.

Кітап авторы Саят Қамшыгер өз сөзінде Қарабақ тақырыбының қазақ оқырманы үшін де жақын екенін, осы еңбек арқылы бауырлас елдің қаһармандық тарихын және Жеңіс шындығын Қазақ еліне көркем туынды арқылы жеткізуді мақсат еткенін білдірді.

Іс-шара соңында Саят Қамшыгерге Әзербайжан Республикасы Милли Мәжілісінің Комитет төрағасы Фазил Мұстафаның атынан Алғыс хат және басқа да ұйымдардың Құрмет грамоталары табысталды. Сондай-ақ, кітапты аударуға және шығаруға үлес қосқан әзербайжандық қаламгерлерге Дүниежүзілік Әдебиет және Өнер академиясының марапаттары берілді.

Жиынға екі елдің танымал ғалымдары, түркологтар, қоғам қайраткерлері мен БАҚ өкілдері қатысты. Тұсаукесер соңында қатысушылар естелік суретке түсіп, Түркі әлемінің әдеби байланыстарын одан ары тереңдету мәселелері бойынша пікір алмасты.