Бағдат Мусин KazLLM-нің неге ChatGPT-дің орнын баса алмайтынын айтты

«Қазақтелеком» АҚ басқарма төрағасы Бағдат Мусин отандық KazLLM жобасын ChatGPT-мен салыстыруға қатысты пікір білдірді. Оның айтуынша, бұл екі жоба жасанды интеллект (ЖИ) инфрақұрылымының принципиалды түрде екі бөлек деңгейіне жатады, деп хабарлайды Digitalbusiness.kz.

Бағдат Мусин қоғамда туындаған басты сұраққа нүкте қойып, бұл жүйелердің деңгейлері әртүрлі екенін атап өтті.

«KazLLM мен ChatGPT - бәсекелес емес. Көбісі KazLLM-ді ChatGPT-дің баламасы деп түсініп, "Біз онымен бәсекелесеміз бе?" деп сұрап жатыр. Жауабым - жоқ», - деп мәлімдеді Мусин.

LLM (үлкен тілдік модель) мен дайын сервистердің айырмашылығын түсіндіру үшін Мусин энергетика саласынан мысал келтірді:

• Фундаменталды модель (LLM) - бұл «интеллектуалды энергия» өндіретін электр станциясы.
• ChatGPT секілді өнімдер - бұл телевизор, шәйнек немесе тоңазытқыш сияқты тұрмыстық құрылғылар.

«Құрылғылар өте ыңғайлы әрі функционалды болуы мүмкін, бірақ электр қуатынсыз олар жұмыс істемейді», - деп түсіндірді ол. Оның айтуынша, OpenAI, Google және Meta сияқты ірі орталықтар инфрақұрылымдық деңгейдегі модельдерді жасайды, ал ChatGPT мен Copilot - сол базаның негізінде құрылған сервистер ғана.

Бағдат Мусиннің айтуынша, KazLLM-ді жасаудағы стратегиялық мақсат нақты бір қосымшамен бәсекелесу емес, мемлекеттің технологиялық егемендігін (AI sovereignty) қамтамасыз ету:

• Меншікті генерация: Ел ішінде жасанды интеллект қуатын өндіру.
• Тәуелділікті азайту: Сыртқы ресурстарға деген шектен тыс мұқтаждықты төмендету.
• Деректерді бақылау: Мәліметтерді өңдеу процесінің қауіпсіздігін қамтамасыз ету.
• Ғылыми мектеп: Отандық мамандар мен ғылыми базаны дамыту.

 «Интеллектуалды энергияны толықтай сырттан импорттауға болады, бұл бастапқыда арзан әрі ыңғайлы көрінуі мүмкін. Бірақ стратегиялық тұрғыдан алғанда, елде өз "генерациясының" болуы — егемендік мәселесі», - деді «Қазақтелеком» басшысы.

Мемлекеттік қолдау мен жауапкершілік

Мусин Президенттің ЖИ саласына ерекше көңіл бөлуі бұл бағытқа үлкен қолдау әрі барлық деңгейдегі мамандарға жоғары жауапкершілік жүктейтінін атап өтті. Оның пайымдауынша, уақытша сын-пікірлерге қарамастан, eGov немесе ЦОН сияқты цифрлық өнімдер халықтың өмірін жеңілдетуді жалғастыра береді, сондықтан сапалы технологиялық негіз қалау маңызды.