БАӘ министрі Астанадағы фестивальді жасанды интеллектің үздік үлгісі ретінде бағалады

Болашақта жалғыз адам басқаратын, бірақ айналымы миллиондаған немесе миллиардтаған долларды құрайтын компаниялар пайда болады. БАӘ Жасанды интеллект істері жөніндегі министрі Омар Аль Олама Абу-Дабиде өткен AI Everything конференциясында заманауи ЖИ-агенттер жеке қызметкерлердің мүмкіндігін бірнеше есеге арттыратынын мәлімдеді.

Министрдің айтуынша, жасанды интеллект агенттері шағын мемлекеттерге халқының аздығына қарамастан, жүздеген миллион халқы бар ірі нарықтармен экономикалық тұрғыдан бәсекелесуге мүмкіндік береді. Ол Абу-Дабидегі компаниялардың бірінде қызметкерлердің 10 пайызын қазірдің өзінде ЖИ-агенттер құрайтынын мысалға келтірді. Бұл агенттер тапсырмаларды жоғары жылдамдықпен орындап, шешім қабылдау сапасын арттыруда.

Омар Аль Олама жасанды интеллект медиа мен ойын-сауық индустриясын да түбегейлі өзгертетінін атап өтті. Бұрын үлкен ұжым мен миллиондаған бюджетті талап ететін фильмдер мен сериалдарды енді бір ғана адам ЖИ құралдары арқылы түсіре алады. Ол АҚШ (Голливуд), Үндістан (Болливуд) немесе Оңтүстік Корея монополиялаған медианарық енді технологияны алғашқы болып ауқымды енгізген елдердің бақылауына өтетінін айтты. Міністр сөз арасында жақында Қазақстанда өткен ЖИ-фильмдер фестивалін мысалға келтіріп, жалғыз режиссердің дәстүрлі миллиондық командалардың жұмысын атқарғанын атап өтті.

Министр по делам искусственного интеллекта ОАЭ Омар Аль Олама

АҚШ-тың Сан-Франциско немесе Ұлыбританияның Лондон сияқты ЖИ орталықтарымен бәсекелесу туралы сұраққа министр БАӘ-нің басты мақсаты тек ЖИ модельдерін ойлап табу емес, оны тез арада қолданысқа енгізіп, өнімді нарыққа шығару екенін айтты. БАӘ үкіметі жақын арада 50% мемлекеттік секторға ЖИ-агенттерді енгізуді жоспарлап отыр.

Одан бөлек, елде ауқымды білім беру бағдарламалары жүріп жатыр: 80 000 мемлекеттік қызметкер ЖИ-суперпайдаланушы ретінде оқытылуда, сондай-ақ Microsoft компаниясымен бірлесіп 1 миллион адамды оқыту бағдарламасы аяқталуға жақын.

ЖИ-жүйелері ракеталар мен электр қозғалтқыштарының күрделі инженерлік жобаларын жасап жатқандықтан, дәстүрлі авторлық құқық жүйесі ескірді. Министрдің пікірінше, адамзат тарихында алғаш рет адам болып табылмайтын жүйе жаңа өнімдер жасап жатыр, сондықтан үкіметтер интеллектуалдық меншік құқығын түбегейлі қайта қарауы тиіс.

Министр ЖИ революциясынан қалыс қалған елдер мен азаматтар экономикалық тұрғыдан артта қалатынын ескертіп, жастарды жаңа технологияларды барынша меңгеруге шақырды.