БАӘ-ге билет алғандар не істеп жатыр? Туристік нарықтағы жаңа трендтер

Таяу Шығыстағы саяси шиеленіс қазақстандықтардың демалыс жоспарына өзгерістер енгізе бастады. Біріккен Араб Әмірліктері мен Парсы шығанағы елдеріне турлар әлі де сатылымда болғанымен, отандастарымыз Оңтүстік-Шығыс Азия бағыттарына көбірек көңіл бөлуде. Бұл туралы Қазақстан туристік қауымдастығының төрайымы Рашида Шайкенова мәлімдеді.

Сарапшының айтуынша, қазіргі уақытта туристік нарықта сақтық байқалады. Әскери шиеленіс аймағына жақын орналасқан елдерге саяхаттаудан сескенген халық «күту» позициясын ұстануда.

 «Қазір Таяу Шығыс елдеріне жаңа брондаулар жоқтың қасы. Алдын ала билет алып қойғандардың өзі қазіргі уақытта брондарын тоқтатып, балама нұсқаларды іздестіріп жатыр», - деді Рашида Шайкенова.

Қалыптасқан жағдайға байланысты қазақстандықтардың назары Оңтүстік-Шығыс Азия елдеріне ауды. Сұраныс жоғары бағыттардың қатарында:

• Вьетнам
• Тайланд
• Мальдив аралдары
• Шри-Ланка
• Индонезия (әсіресе Бали аралы)

Бұл елдердің басты артықшылығы - тікелей рейстердің болуы және визасыз режим. Сонымен қатар, Түркия мен Мысыр (Египет) да балама ретінде қарастырылуда.

Сарапшы БАӘ-нің әлі де көшбасшы бағыттардың бірі екенін айтады. Ыңғайлы логистика мен қалыптасқан сервистің арқасында көптеген туристер жағдайдың тұрақталғанын күтуде. Наурыз мейрамы қарсаңында нарықтың қай бағытқа қарай ауысатыны нақтырақ белгілі болмақ.

«Бұл жағдай туризм саласының қаншалықты нәзік екенін тағы бір дәлелдеді. Сала тек экономикалық немесе табиғи факторларға ғана емес, саяси тұрақтылыққа да тікелей тәуелді», - деп түйіндеді ҚТҚ төрайымы.