БАӘ-де 300-ге жуық қазақстандық азамат елге қайта алмай отыр – СІМ

Израиль мен Иран арасындағы шиеленістің күшеюіне байланысты Біріккен Араб Әмірліктерінде (БАӘ) 300-ге жуық қазақстандықтың елге оралуы қиындады. Бұл туралы ҚР Сыртқы істер министрлігінің ресми өкілі Айбек Смадияров дүйсенбі күні өткен брифингте хабарлады.

– Қазіргі таңда БАӘ мен Қазақстан арасындағы бірқатар авиакомпанияның рейстерінің тоқтатылуына байланысты 300-ге жуық азаматымыздың, басым бөлігі – туристер, елге оралуы уақытша кешіктіріліп жатыр. Оқиға орнында біздің дипломаттар жұмыс істеп жатыр. Әуе компанияларымен жасалған келіссөздер нәтижесінде жақын күндері олардың жартысынан көбі елге қайтарылады деп күтіледі, – деді СІМ өкілі.

Смадияров 11 маусымда Қазақстанның Мәдениет және спорт министрлігінің Туризм комитеті арнайы үндеу жариялап, Иран, Израиль, Сирия, Ирак, Иордания және Ливан аумақтарында және олардың маңындағы әуе кеңістігіне ұшуға тыйым салынғанын ескерткенін еске салды. Сонымен қатар азаматтарға сапарларын жоспарлауда, әсіресе БАӘ мен Парсы шығанағы елдеріне бару кезінде, барлық ықтимал қатерлерді ескеруге кеңес берілген.

– Қазақстан Үкіметінің ескертуіне қарамастан, соңғы екі күнде БАӘ бағытына Қазақстаннан толық жүктемемен ұшақтар аттанды, – деді Смадияров.

Оның айтуынша, қажет болған жағдайда Қазақстан азаматтарын елге қайтару мәселесі «Қамқор» туристер қоры және әуе компаниялармен бірлесіп шешілетін болады.