Азов теңізіндегі дрон шабуылынан бес Әзербайжан азаматы қаза тапты

Азов теңізіндегі Таганрог шығанағында екі жүк кемесіне жасалған дрон шабуылы салдарынан бес Әзербайжан азаматы көз жұмып, тағы үшеуі жарақат алды.

Бұл туралы Әзербайжан Сыртқы істер министрлігінің ресми өкілі Айхан Гаджизаде мәлімдеді. Оның айтуынша, шабуылға ұшыраған кемелер экипажының құрамында жалпы 25 Әзербайжан азаматы болған.

Ресей тарапы Бакуге бес адамның қаза тапқанын хабарлаған. Зардап шеккен үш теңізші Ресейдің Ейск қаласындағы ауруханаға жеткізілген.

Гаджизаде шабуылға ұшыраған кемелердің Әзербайжан мемлекетіне тиесілі емес екенін атап өтті.

Алдын ала мәлімет бойынша, сөз Белиз туымен жүзген «Натра» және Палау туымен тіркелген «Циркон» жүк кемелері туралы болып отыр. Олар Түркиядан Ростов-на-Дону қаласына бағыт алған.

Әзірге шабуылды жүзеге асырған дрондардың қай елге тиесілі екені ресми түрде нақтыланбады. Сонымен қатар Украина Қарулы күштерінің ұшқышсыз жүйелер күштерінің қолбасшысы Роберт Бровди сол түні Мариуполь, Бердянск порттарында және Украинаның оккупацияланған аумақтары маңындағы суларда бес кемеге соққы жасалғанын мәлімдеді.