Айына 3 млн теңгеден көп табатындарға 15% салық салынуы мүмкін

Жалақысы жоғары азаматтарға жеке табыс салығы бойынша прогрессивті шкала енгізу жоспарланып отыр, деп хабарлады Ұлттық экономика министрінің бірінші орынбасары Азамат Әмрин. Бұл бастама салық реформасы аясындағы қосымша түзетулер пакетінде қарастырылып жатыр.

Вице-министрдің айтуынша, ай сайынғы табысы 3 миллион теңгеге дейін болатын азаматтар үшін қазіргі 10 пайыздық мөлшерлеме сақталады. Ал табысы 3 миллион теңгеден асатындар үшін салық мөлшерлемесі 15 пайызға дейін көтеріледі.

«Негізгі өзгеріс – жоғары табысқа ие азаматтарға арналған прогрессивті шкаланы енгізу. Бұрын, 2007 жылға дейін, бес деңгейден тұратын шкала болған. Бұл жолы жүйені күрделендірмей, екі ставкамен шектелу ұсынылып отыр», – деді Азамат Әмрин.

Ол бұл нормалар жеке табыс салығы туралы заң жобасының аясында қарастырылып жатқанын атап өтті.

Бұған дейін вице-премьер, Ұлттық экономика министрі Серік Жұманғарин жылдық табысы 8 500 АЕК-тен (шамамен 29,2 млн теңге) асатын азаматтарға 15% салық салынатынын хабарлаған болатын.