Айына 1 миллион теңге жіберемін»: Шымкенттік майор неге әскери қызметтен кетті?

Он жыл бойы әскери салада мінсіз қызмет еткен шымкенттік офицер Самат Дербісәлиев өмірін күрт өзгертіп, Оңтүстік Кореяға еңбек миграциясына аттанды. Бұл туралы Digital Business басылымына сілтеме жасап хабарлаймыз.

Самат Дербісәлиев – Ресейдің беделді әскери училищесін қызыл дипломмен тәмамдаған кәсіби маман.

Ол 2025 жылға дейін Алматы мен Шымкент қалаларында қызмет етіп, майор шеніне дейін көтерілген. Алайда, офицердің айтуынша, 320 мың теңге көлеміндегі жалақы екі баласы бар отбасын асырауға және жиналып қалған несиелерді жабуға жетпеген. 

Әскерилердің жалақысын 30 пайызға көтеру туралы уәде орындалмаған соң, ол қызметтен өз еркімен кетіп, шетелден жұмыс іздеуге бел буған.

Бүгінде бұрынғы майор Оңтүстік Кореяның кеме жасау зауытында еңбек етуде. Ол мұнда айына орта есеппен 2500 доллар (шамамен 1,2 миллион теңге) табыс табады. Саматтың айтуынша, Кореяда жұмысшыларға деген көзқарас пен мотивация жүйесі жоғары деңгейде дамыған.

«Кореяда жұмыс істеу үшін көпжылдық стаж талап етілмейді, мұнда тек нақты нәтиже мен еңбекқорлық маңызды. Жұмыс берушілер жұмысшының қабілетіне қарай жалақыны тез арада қайта қарап отырады», — дейді ол.

Самат өте қатаң үнемдеу режимін ұстанады: жатын орны мен коммуналдық төлемдеріне небәрі 150 доллар жұмсап, жұмыс орнындағы тегін тамақты пайдаланады. Осының нәтижесінде ол ай сайын Қазақстандағы отбасына 1 миллион теңгеден астам қаражат жіберіп отыр.

Дегенмен кейіпкер жат елдегі тілдік кедергілер мен жалғыздықтың оңай еместігін де жасырмады. Ол өз қарыздарын толық өтеп болған соң, елге оралып, жинаған капиталына жеке кәсібін ашуды жоспарлап отыр. Бұл хикая қазіргі таңда қазақстандық білікті мамандардың әлеуметтік жағдайға байланысты шетелге кету үрдісінің айқын мысалына айналды.