Аймағамбетов: Бір дәрігерді соққыға жығу – мың адамды емсіз қалдыру деген сөз

Мәжілісте депутат Асхат Аймағамбетов медицина қызметкерлерінің қауіпсіздігін арттыруға арналған заң жобасын бірінші оқылымда таныстырды. Ол сөзін нақты мысалдармен бастап, дәрігерлерге қарсы жасалатын зорлық-зомбылықтың қоғам үшін ауыр салдары бар екенін атап өтті.

Аймағамбетовтің айтуынша, Қостанай қаласында тәжірибелі урологқа жасалған шабуылдың салдары тек бір адамның жарақат алуымен шектелмеген.

«Дәрігердің бас сүйегі сынып, миына қан құйылды. Ол төрт ай жұмысқа шыға алмады. Ал осы уақыт аралығында шамамен 960 адам медициналық көмекке қол жеткізе алмады. Демек, бір дәрігерге қол көтеру — мыңға жуық адамды емсіз қалдырумен тең», – деді депутат.

Ол сондай-ақ жедел жәрдем қызметкерлеріне жасалған шабуыл туралы да айтты. Мас адамдардың қолынан фельдшер мен жүргізуші жарақат алған.

«Жедел жәрдем жүргізушісі – фельдшердің жалғыз қорғаушысы, ол көмекші де, тіпті тасушы рөлін де атқарады. Олар 15 күн жұмысқа шыға алмады. Бұл уақытта 120 шақыртуға баруы тиіс еді. Демек, мұндай оқиға – жай ғана төбелес емес, өмір мен өлім мәселесі», – деді Аймағамбетов.

Соңғы бес жылда елде 280 медицина қызметкеріне шабуыл тіркелген. Бірақ шынайы көрсеткіш бұдан әлдеқайда жоғары болуы мүмкін, себебі көп дәрігер арыздануға қорқады.

«Өйткені олардың қорғау табатынына сенімдері жоқ», – деді депутат.

Заң жобасы Президент Қасым-Жомарт Тоқаевтың тапсырмасына сәйкес әзірленген. Онда Қылмыстық кодекске жаңа 380-3-бап енгізу көзделген. Ол «медицина қызметкері» және «жедел медициналық жәрдем жүргізушісі» деген арнайы субъектіні белгілейді.

«Бүгінде полицейлер, прокурорлар, судьялар және тіпті орман инспекторлары заңмен қорғалады. Ал адамның өмірін сақтап жүрген дәрігерге қол көтеру – тек бұзақылық ретінде бағаланады. Бұл әділетсіз», – деді депутат.

Аймағамбетов жаңа баптың мазмұны егерьлерді қорғау жөніндегі бапқа ұқсас екенін атап өтті.

«Ақ халатты абзал жандар да дәл сондай құқықтық қорғауға лайық. Өйткені олар күн сайын қауіп-қатер жағдайында жұмыс істейді», – деді ол.

Сонымен қатар, депутат дәрігерлердің өз жұмысына жауапкершілігі жоғары болғанымен, олар мемлекет тарапынан қорғансыз екенін айтты.

«Дәрігер өз міндетін орындамаса, қателік жіберсе – бес жылға дейін бас бостандығынан айырылуы мүмкін. Бірақ оған қол көтерген адам тек айыппұл төлеп құтылады. Бұл – әділетсіздік», – деді Аймағамбетов.

Ол сонымен бірге ерлікпен көз жұмған фельдшер Ұлдана туралы мысал келтіріп, медицина қызметкерлерінің жанқиярлығын атап өтті.

Аймағамбетовтің айтуынша, дәрігерге шабуыл жасау – тек жеке тұлғаға емес, ұлт саулығына қарсы қылмыс.

«Хирургтың қолы – адам өмірін құтқаратын құрал. Егер оның саусағы сындырылса, ол енді ота жасай алмайды. Демек, бұл мыңдаған адамның тағдырына әсер етеді», – деді ол.

Депутат жедел жәрдем мен қабылдау бөлімдерінің қауіпті жағдайда жұмыс істейтінін де еске салды.

«Олар кімнің үйіне кіріп бара жатқанын білмейді. Біз полицей мен прокурорды қорғасақ, адам өмірін арашалап жүрген дәрігерді де қорғауға міндеттіміз», – деді ол.

Аймағамбетов сөзінің соңында заң жобасының мақсатын нақтылады.

«Бұл тек дәрігерлерді қорғау туралы заң емес. Ашығын айтқанда Заң жобасы – дәрігерлерді емес, біздің азаматтарымыздың құқығын қорғау туралы. Бұл – педиатрды күтіп отырған кішкентай балаларды қорғау туралы норма. Бұл – инфаркт алып жедел жәрдем шақырған зейнеткерлерді қорғау туралы. Бұл – бүкіл денсаулық сақтау жүйесінің тұрақтылығы туралы заң. Бұл нақты сигнал: дәрігерлер мен жедел жәрдемшілерге тиісуге болмайды», – деді депутат.

Жаңа бап қабылданған жағдайда, дәрігерлер мен жедел жәрдем қызметкерлеріне қол көиергендер 12 жылға дейін бас бостандығынан айырылуы мүмкін.